شیعہ نیوز: ایم ڈبلیو ایم کے رہنماء علامہ مقصود علی ڈومکی نے کہا ہے کہ تولیٰ اور تبرّی قرآن و سنت کی تعلیمات کا بنیادی حصہ ہیں۔ قرآن کریم نے ان پر لعنت کی ہے جو اللہ تعالیٰ اور اس کے رسولؐ کو اذیت دیتے ہیں، جبکہ رسول اکرمؐ نے اہل بیتؑ سے محبت اور مودت کو فرض قرار دیا اور آل محمد صلی اللہ علیہ وآلہ وسلم کی اذیت کو اپنی اذیت قرار دیا۔ انہوں نے کہا کہ جو شخص اللہ، رسولؐ اور آلِ محمدؑ کے دشمنوں سے براءت کا اظہار کرتا ہے، وہ قرآن و سنت کی تعلیمات پر عمل کرتا ہے۔ ان خیالات کا اظہار انہوں نے لکھی غلام شاہ کے شہر چک میں رہائیِ اسیرانِ شام کے سلسلے میں منعقدہ 78ویں سالانہ مجلسِ عزاء سے خطاب کرتے ہوئے کیا۔ مجلس عزاء کا انعقاد نہایت عقیدت و احترام کے ساتھ کیا گیا، جس میں عزادارانِ امام حسینؑ اور اہلِ علاقہ ہزاروں کی تعداد میں شرکت کی۔
مجلسِ عزاء سے مجلس وحدت مسلمین سندھ کے صوبائی صدر علامہ مقصود علی ڈومکی نے خطاب کرتے ہوئے فضائل اہل بیتؑ، اسیرانِ اہل بیتؑ کی مظلومیت اور عصرِ حاضر کے حالات پر تفصیلی روشنی ڈالی۔ علامہ مقصود علی ڈومکی نے کہا کہ مجلسِ عزاء صرف غم و سوگ کا نام نہیں، بلکہ شعور، بیداری، حق شناسی اور ظلم کے خلاف مزاحمت کا پیغام ہے۔ امام حسینؑ نے کربلا میں انسانیت کو یہ درس دیا کہ ظالم خواہ کتنا ہی طاقتور کیوں نہ ہو، حق والوں کے مقابلے میں ذلیل اور رسوا ہوتا ہے۔ آج بھی عزاداری ہمیں مظلوم کا ساتھ دینے اور ظالم کے خلاف قیام کرنے کا حوصلہ عطا کرتی ہے۔ انہوں نے کہا کہ آج فلسطین اور بالخصوص غزہ میں امریکہ اور اسرائیل کی جانب سے جاری ظلم و بربریت پوری انسانیت خصوصاً امت مسلمہ کے لئے ایک بڑا امتحان ہے۔ غزہ میں معصوم بچوں، خواتین اور عام شہریوں کا قتل، آبادیوں کی تباہی اور بنیادی انسانی حقوق کی پامالی پر مسلم حکمرانوں کی خاموشی انتہائی افسوسناک ہے۔ امتِ مسلمہ کو چاہئے کہ باہمی اختلافات سے بالاتر ہو کر فلسطین کے مظلوم عوام کے حق میں مؤثر اور متحد آواز بلند کرے۔
یہ بھی پڑھیں : آبنائے ہرمز سے پرامن آمد و رفت کا معاملہ پورے خطے کی سلامتی سے الگ نہیں، عمان کے وزیر خارجہ
انہوں نے کہا کہ اسرائیل خطے میں سرطان کے پھوڑے کی مانند ہے اور فلسطینی عوام کی نسل کشی اور فلسطین پر قبضے کی پالیسی کسی صورت قابلِ قبول نہیں۔ عالمِ اسلام کو چاہئے کہ فلسطین کے مظلوم عوام کی سیاسی، اخلاقی اور انسانی حمایت جاری رکھے۔ عصرِ حاضر کے حوالے سے علامہ مقصود علی ڈومکی نے کہا کہ آج دنیا میں ظلم و جبر کے خلاف مزاحمت کی ایک نئی لہر پیدا ہو چکی ہے۔ رہبرِ شہید آیت اللہ سید علی خامنہ ای نے اپنی جدوجہد اور پاکیزہ لہو کے ذریعے امریکہ اور اسرائیل کی استعماری پالیسیوں کے خلاف اہل حق کی مزاحمت کو نئی قوت دی ہے۔ انہوں نے کہا کہ آج دنیا کی مظلوم اقوام سامراجی طاقتوں کے مقابلے میں ایران اور رہبرِ شہید کی استقامت کو اپنے لئے اسوۂ حسنہ سمجھتی ہیں۔ انہوں نے مزید کہا کہ موجودہ دور میں امتِ مسلمہ کو اتحاد، بصیرت، خودداری اور مزاحمت کی ضرورت ہے۔ عالمی استکبار مسلم ممالک کو تقسیم کرکے ان کے وسائل پر قبضہ اور ان کی سیاسی خودمختاری کو کمزور کرنا چاہتا ہے۔ ایسے حالات میں کربلا کا پیغام ہمیں یہ سکھاتا ہے کہ حق اور باطل کے معرکے میں خاموش تماشائی بننے کے بجائے حق کا ساتھ دینا ضروری ہے۔
The post آج دنیا کی مظلوم اقوام سامراجی طاقتوں کے مقابلے میں ایران اور رہبرِ شہید کی استقامت کو اپنے لئے اسوۂ حسنہ سمجھتی ہیں،علامہ مقصودڈومکی appeared first on شیعہ نیوز پاکستان.
