شیعہ نیوز: اسلامی مزاحمتی تحریک حماس نے عالمی برادری سے مطالبہ کیا ہے کہ اسرائیل کو سیز فائر کی ذمہ داریوں پر عمل درآمد کرانےکے لیے مؤثر اور فوری اقدامات کیے جائیں، خاص طور پر اس پس منظر میں جب اقوام متحدہ اور 200 سے زائد انسانی حقوق کی تنظیموں نے مشترکہ بیان جاری کر کے خبردار کیا کہ قابض اسرائیل کی رکاوٹیں غزہ میں انسانی امدادی کارروائیوں کے تسلسل کو خطرے میں ڈال رہی ہیں۔
حماس نے ایک بیان میں کہا کہ اقوام متحدہ کی جانب سے اسرائیل کی طرف سے درجنوں بین الاقوامی امدادی تنظیموں کے اندراج کو منسوخ کرنے کے خدشے پر انتباہ، قابض اسرائیل کے انسانی بحران کو بڑھانے والے رویے کی سنگینی کو واضح کرتا ہے۔
حماس نے زور دیا کہ یہ پالیسیاں بین الاقوامی سطح پر فوری کارروائی کی متقاضی ہیں تاکہ غزہ میں فلسطینی عوام کی فوری مدد ممکن ہو سکے۔
یہ بھی پڑھیں : غزہ میں سیز فائر کی اسرائیلی خلاف ورزیاں ثالثوں کو مشکل اور معاہدے کو خطرے میں ڈال رہی ہیں، قطر
بیان میں مزید کہا گیا کہ بنجمن نیتن یاھو کی قیادت میں قائم قابض اسرائیلی حکومت “اقوام متحدہ اور بین الاقوامی تنظیموں کی تصدیق کے مطابق منظم طور پر محاصرہ سخت کر رہی ہے اور انسانی امداد کو ہتھیار کے طور پر استعمال کر رہی ہے جس کے نتیجے میں شہری بنیادی حقوق سے محروم ہیں اور یہ قابض اسرائیل کی نسل کشی کی جاری جنگ کا حصہ ہے جو مختلف شکلوں میں فلسطینی عوام پر مسلط کی گئی ہے۔
حماس نے واضح کیا کہ یہ پالیسیاں سیز فائر کے معاہدے کی کھلی خلاف ورزی ہیں، جو امریکی صدر ڈونلڈ ٹرمپ کی نگرانی میں طے پایا تھا، اور سیکڑوں ميدانی خلاف ورزیاں پہلے ہی سینکڑوں فلسطینیوں کی شہادت کا سبب بن چکی ہیں، چاہے وہ قابض فوج کی فائرنگ کی وجہ سے ہوں، یا امدادی کارروائیوں اور نازحین کے قیام میں رکاوٹ کے نتیجے میں۔
الزامی بیان میں حماس کے ترجمان حازم قاسم نے کہا کہ غزہ میں شدید سردی کے سبب بچوں کی شہادت ایک واضح جرم ہے جو قابض اسرائیل نے تعمیر نو کی روک تھام اور محاصرہ جاری رکھ کر کیا ہے۔
قاسم نے مزید کہا کہ بار بار کی اپیلیں، جیسے حقیقی پناہ گاہوں کا قیام اور تعمیر نو کا آغاز، دنیا کو متحرک کرنے میں ناکام رہی ہیں تاکہ غزہ کے وہ بچے بچ سکیں جو پہلے بمباری میں مرتے تھے اور آج سردی کی وجہ سے ہلاک ہو رہے ہیں۔
انہوں نے عالمی برادری سے فوری اور سنجیدہ اقدامات کا مطالبہ کیا تاکہ غزہ میں انسانی بحران کو بڑھنے سے روکا جا سکے اور بڑے پیمانے پر ہلاکتوں سے بچا جا سکے، اور امریکہ کی حکومت اور صدر ڈونلڈ ٹرمپ سے کہا کہ وہ قابض اسرائیل پر دباؤ ڈالیں تاکہ وہ سیز فائر کے انسانی اور امدادی حصوں کی پابندی کرے اور بین الاقوامی امدادی تنظیموں کے کام میں رکاوٹ نہ ڈالے۔
اسی روز ناصر میڈیکل کمپلیکس نے اعلان کیا کہ شدید سردی کے سبب خان یونس کے علاقے المواصی میں ایک بچہ شہید ہو گیا، جو گذشتہ دنوں شدید موسمی حالات میں ہلاک ہونے والے دیگر بچوں میں شامل ہو گیا۔
غزہ میں گذشتہ ہفتے کے دوران دو شدید موسمی دباؤ آئے جن کے نتیجے میں 16 فلسطینی شہید ہوئے، جس سے اس خطے میں زندگی کی مشکلات مزید بڑھ گئیں، یہ خطہ پہلے ہی قابض اسرائیل کی دو سالہ نسل کش جنگ کی تباہ کاریوں سے متاثر ہے، جس میں 70 ہزار سے زائد افراد ہلاک اور 171 ہزار زخمی ہوئے، اور تقریباً 90 فیصد شہری بنیادی ڈھانچہ تباہ ہو چکا ہے۔
The post اسرائیل کو غزہ میں جنگ بندی کی ذمہ داریوں پر سختی سے عمل درآمد کرایا جائے، حماس appeared first on شیعہ نیوز پاکستان.
