شیعہ نیوز:لبنانی وزارت صحت کے جاری اعداد و شمار کے مطابق اس ہفتے اسرائیلی حملوں کے نتیجے میں شہداء کی تعداد میں اضافہ ہو رہا ہے، کیعنکہ اسرائیلی فضائی حملوں کا سلسلہ مختلف علاقوں میں جاری ہے۔ اب تک مجموعی تعداد 123 تک پہنچ چکی ہے، جبکہ 683 زخمی بھی ہیں۔
لبنان کے سرکاری خبر رساں ادارے نیشنل نیوز ایجنسی کے مطابق جمعہ کی صبح اسرائیلی جنگی طیاروں نے جنوبی لبنان کے متعدد قصبوں پر فضائی حملے کیے۔ ان حملوں میں صریفا، عیتا الشعب، تولین، السوانہ اور مجدل سلم کے علاقے نشانہ بنے۔
اسی دوران لبنان کے مشرقی شہر دوریس پر بھی علی الصبح ایک اور حملہ کیا گیا، جس کے نتیجے میں مزید تباہی کی اطلاعات سامنے آئیں۔
ادھر لبنانی مزاحمتی تنظیم حزب اللہ نے اسرائیلی سرحد کے قریب رہنے والے شہریوں کو خبردار کیا ہے کہ وہ سرحد سے پانچ کلومیٹر کے اندر واقع قصبے خالی کر دیں۔
بیروت کے جنوبی علاقے، جو داحیہ کے نام سے معروف ہیں، وہاں سے بڑی تعداد میں لوگوں نے نقل مکانی شروع کر دی ہے۔ اس علاقے میں تقریباً پانچ لاکھ افراد رہتے ہیں اور اسرائیلی دھمکی کے بعد بڑی تعداد میں خاندان اپنے گھروں کو چھوڑنے پر مجبور ہو گئے ہیں۔
یہ بھی پڑھیں : ایران میں ایک ہزار سے زائد اور لبنان میں 70 افراد شہید ہوئے، رپورٹ
اسرائیلی فوج کا کہنا ہے کہ اس نے داحیہ کے علاقے میں چھبیس مختلف حملے کئے ہیں۔ اسرائیلی حکام کے مطابق ان حملوں میں حزب اللہ کے مختلف مراکز، انتظامی کونسل کے صدر دفتر اور ڈرون رکھنے کے ایک گودام کو نشانہ بنایا گیا ہے۔
دوسری جانب حزب اللہ نے اسرائیلی حملوں کی سخت مذمت کرتے ہوئے کہا ہے کہ لبنان کی خودمختاری اور شہریوں کے خلاف یہ کارروائیاں بلا جواب نہیں رہیں گی۔ تنظیم کے مطابق شہری انفراسٹرکچر کی تباہی اور لوگوں کو زبردستی بے گھر کرنے کی مہم کے خلاف بھرپور ردعمل دیا جائے گا۔
حزب اللہ نے جمعہ کی صبح اسرائیلی زمینی افواج کے خلاف کئی حملوں کی ذمہ داری بھی قبول کی ہے۔ تنظیم کے مطابق اس کے جنگجوؤں نے لبنان کے اندر موجود اسرائیلی فوجیوں کو مرون الراس اور کفر کیلا سمیت مختلف علاقوں میں نشانہ بنایا۔
تنظیم کے بیان میں کہا گیا ہے کہ مقبوضہ گولان کی پہاڑیوں میں اسرائیلی فوجی کیمپ اور حیفا کی بندرگاہ میں موجود بحری اڈے پر بھی حملے کیے گئے۔ ان حملوں میں فوری طور پر کسی جانی نقصان کی تصدیق نہیں ہو سکی۔
ادھر اسرائیل کا کہنا ہے کہ وہ اپنی سرحدی بستیوں کو خالی نہیں کرے گا، جبکہ لبنان کے اندر مزید فوجی دستے بھیج دیئے ہیں۔ اسرائیلی حکام کا دعویٰ ہے کہ یہ اقدامات سرحد کے قریب رہنے والے اپنے شہریوں کے تحفظ کے لیے کیے جا رہے ہیں۔
The post اسرائیل کی لبنان پر وحشیانہ بمباری جاری، شہداء کی تعداد 123 ہوگئی appeared first on شیعہ نیوز پاکستان.
