شیعہ نیوز: الباکستانیوں کی آنکھیں کھولنے کیلئے!امریکی جنرل کا اعترافِ جرم یا عرب حکمرانوں کے خلاف کھلی چارج شیٹ؟
حقائق اب کسی سے چھپے نہیں رہے۔
امریکی چیئرمین جوائنٹ چیفس آف اسٹاف کا سنسنی خیز انکشاف
پینٹاگون میں ہونے والی ایک حالیہ پریس کانفرنس نے مشرقِ وسطیٰ کی سیاست اور جنگی اتحاد کا سارا کچا چٹھا چوراہے پر لا کر رکھ دیا ہے۔ امریکی محکمہ جنگ (Department of War) کے سیکرٹری پیٹ ہیگستھ کے ہمراہ میڈیا سے گفتگو کرتے ہوئے امریکی فضائیہ کے جنرل اور چیئرمین جوائنٹ چیفس آف اسٹاف **جنرل ڈین کین (Gen. Dan Caine)** نے کھلے عام نہ صرف خلیجی ممالک کا شکریہ ادا کیا بلکہ ان کے نام لے کر گواہی دی کہ وہ ایران کے خلاف جنگ میں امریکہ اور اسرائیل کے ساتھ عملی طور پر کھڑے ہیں۔
جنرل ڈین کین نے اپنے بیان میں واضح طور پر ان عرب ممالک کا نام لیا:
سعودی عرب
متحدہ عرب امارات (UAE)
بحرین
قطر
کویت
اردن
ان کا کہنا تھا کہ ان تمام ممالک کے مقتدر حلقوں نے امریکی اور اسرائیلی مفادات، اہلکاروں اور جنگی اثاثوں کے دفاع کے لیے فرنٹ لائن کا کردار ادا کیا اور ضرورت پڑنے پر وہ دوبارہ بھی اس کے لیے تیار ہیں۔
یہ بیان محض رسمی تشکر نہیں، بلکہ ان تمام عرب ریاستوں کے خلاف ایک ایسی ناقابلِ تردید چارج شیٹ ہے جس کے بعد اب کوئی کتنا ہی بڑا جھوٹ بولنا چاہے، نہیں بول سکتا۔
یہ بھی پڑھیں : سابق امیر جماعت اسلامی پاکستان سراج الحق حرمِ امام حسینؑ کی دعوت پر کربلاعراق پہنچ گئے
ایک طرف ہمارے مقامی مبلّغین اور تجزیہ کار گلا پھاڑ پھاڑ کر عرب دنیا کی مظلومیت کا راگ الاپ رہے ہیں اور مسلسل یہ سوال اٹھا رہے ہیں کہ ایران عرب ممالک پر کیوں حملے کر رہا ہے، تو دوسری طرف خود امریکی فوجی قیادت یہ اعتراف کر رہی ہے کہ ایران کے خلاف استعمال ہونے والے تمام اہم جنگی آپریشنز اور فضائی حملے انہی عرب ممالک کی سرزمین پر موجود امریکی فوجی اڈوں سے کیے جا رہے ہیں۔
کچھ عرصہ قبل جب ایک حملے میں 200 کے قریب معصوم اسکولی بچیاں نشانہ بنیں، تو اس کی کڑیاں بھی ایک عرب ملک میں قائم امریکی بیس سے جا ملی تھیں۔ حال ہی میں بچوں کے ایک اسپتال کو نشانہ بنانے والے بزدلانہ حملے کے پیچھے بھی انہی ممالک کی سرزمین استعمال ہوئی۔ جب آپ اپنی زمین سپر پاورز کو اپنے ہی پڑوسیوں کے خلاف بمباری کے لیے پلیٹ فارم کے طور پر پیش کریں گے، تو ردِعمل کو مظلومیت کا نام دینا عقل پسندی نہیں ہے۔
تاریخ گواہ ہے کہ امریکہ اور اس کے اتحادی یہ جنگ کبھی نہیں جیت سکتے۔ صرف محاذِ جنگ ہی نہیں، بلکہ سفارتی، معاشی اور تزویراتی سطح پر بھی امریکی و اسرائیلی گٹھ جوڑ کو مسلسل ہزیمت کا سامنا ہے۔
مگر اس پورے کھیل کا سب سے المناک اور اہم ترین پہلو وہ ہے جسے سب سے زیادہ نظر انداز کیا جا رہا ہے۔ ماضی کی طرح، امریکہ جب بھی دیکھے گا کہ اس کی اپنی معیشت اور فوج اس جنگ کی دلدل میں دھنس رہی ہے، وہ خاموشی سے اپنے بستر گول کرے گا اور ان تمام خلیجی اتحادیوں کو ایران کے رحم و کرم پر چھوڑ کر نکل جائے گا۔
تب پینٹاگون کے یہ شکرگزار جنرل اپنے ایئرکنڈیشنڈ دفاتر میں واپس جا چکے ہوں گے اور یہ علاقائی اتحادی تن تنہا بانسری بجاتے رہ جائیں گے۔
The post الباکستانیوں کی آنکھیں کھولنے کیلئے!امریکی جنرل کا اعترافِ جرم یا عرب حکمرانوں کے خلاف کھلی چارج شیٹ؟ appeared first on شیعہ نیوز پاکستان.
