شیعہ نیوز: اسرائیلی فوج آج بدھ کے روز مسلسل تیسرے دن الخلیل شہر میں اپنی فوجی جارحیت جاری رکھے ہوئے ہے، جس کے دوران چھاپوں، گرفتاریوں اور طلبیوں کی کارروائیاں کی جا رہی ہیں، جبکہ فلسطینی قبائل کی جانب سے صہیونی مطالبات کو دو ٹوک انداز میں مسترد کر دیا گیا ہے۔
اسرائیلی فورسز نے اپنی جاری فوجی یلغار کے دوران الخلیل سے سات فلسطینی شہریوں کو گرفتار کیا، جن کے گھروں پر دھاوے بولے گئے، تلاشی لی گئی اور گھریلو سامان کی توڑ پھوڑ کی گئی، یہ سب کچھ شدید سردی اور بارش کے ماحول میں کیا گیا۔
اسرائیلی فوجیوں نے الخلیل شہر کے جنوبی علاقے پر یلغار کی اور شہریوں صبیح غالب ابو حمدیہ غیث، احمد صابر برقان، عبدالمعز عبدالعزیز ابو ترکی، یعقوب یحییٰ الرجبی، علی الرجبی اور تامر طلب العجلونی کو گرفتار کیا، جبکہ شمال مغربی الخلیل کے قصبہ صوريف سے مصعب خلیل غنیمات کو بھی حراست میں لیا گیا۔
یہ بھی پڑھیں : امارات کے بعد بحرین نے بھی ٹرمپ کے بورڈ آف پیس میں شمولیت کی دعوت قبول کر لی
اسرائیلی فورسز نے تمام گرفتار شہریوں کو شدید تشدد کا نشانہ بنانے کے بعد نامعلوم مقام پر منتقل کر دیا، جبکہ الخلیل کے جنوبی علاقے میں کئی ذیلی سڑکیں لوہے کے دروازوں، سیمنٹ کے بلاکس اور مٹی کے بند لگا کر مسلسل تیسرے روز بھی بند رکھی گئی ہیں۔
اسرائیل کی فوج نے الخلیل شہر، اس کے قصبوں، دیہات اور پناہ گزین کیمپوں کے داخلی راستوں پر متعدد فوجی ناکے قائم کر رکھے ہیں اور کئی مرکزی اور ذیلی سڑکوں کو لوہے کے دروازوں، سیمنٹ کے بلاکس اور مٹی کے پشتوں سے بند کر دیا ہے۔
اسی دوران قابض اسرائیلی فوج نے جنین شہر کے جنوبی علاقے سے تعلق رکھنے والے تقریباً پچیس قبائلی عمائدین اور صلح کرانے والے افراد کو طلب کیا اور انہیں آگاہ کیا کہ فوجی کارروائی اس وقت تک نہیں رکے گی جب تک شہریوں اور خاندانوں کے پاس موجود اسلحہ جمع نہ کر لیا جائے۔
تاہم فلسطینی قبائل نے ان مطالبات کو مسترد کرتے ہوئے واضح کیا کہ اس نوعیت کے اقدامات ان کے دائرہ اختیار میں نہیں آتے اور وہ ایسا نہیں کر سکتے، یہ سب کچھ اسرائیل کی فوجی کارروائی اور ان علاقوں میں جاری کرفیو کے ساتھ ساتھ ہو رہا ہے جو صرصوریہ سے جبل جوہر اور المختار کے علاقے تک پھیلے ہوئے ہیں۔
The post الخلیل میں اسرائیل کی مسلسل فوجی یلغار، صہیونی مطالبات مسترد appeared first on شیعہ نیوز پاکستان.
