شیعہ نیوز: متحدہ عرب امارات کے بعد بحرین نے بھی ٹرمپ کے غزہ بورڈ آف پیس میں شمولیت کی دعوت قبول کر لی۔
بحرینی وزارت خارجہ کے مطابق امریکہ نے غزہ امن بورڈ میں شمولیت کی دعوت دی جسے شاہِ بحرین حماد بن عیسیٰ آل خلیفہ نے قبول کر لیا ہے۔
وزارتِ خارجہ کے مطابق مملکتِ بحرین کا یہ فیصلہ غزہ کے لیے صدر ٹرمپ کے 20 نکاتی امن منصوبے پر مکمل عمل درآمد کی حمایت کے عزم کی عکاسی کرتا ہے، کیونکہ یہ منصوبہ فلسطینی عوام کے جائز حقوق کے تحفظ کے لیے نہایت اہم ہے۔
یہ بھی پڑھیں : مقبوضہ بیت المقدس میں اسرائیل نے اقوام متحدہ کی عمارت منہدم کردی
بحرینی وزارت خارجہ کا کہنا ہے کہ امید ہے بورڈ آف پیس اپنے مقاصد حاصل کرے گا، جن میں تعاون کا فروغ، استحکام کی حمایت، اور سب کے لیے ترقی و خوشحالی کا حصول شامل ہے۔
دوسری جانب عالمی ذرائع ابلاغ کی رپورٹوں کے مطابق ٹرمپ کی سربراہی میں قائم اس بورڈ آف پیس کی ممرشپ فیس 1 ارب ڈالر مقرر کی گئی ہے۔
خبررساں ایجنسی کا کہنا ہے کہ بورڈ کے چارٹر کے مطابق، رکن ممالک کی مدتِ رکنیت زیادہ سے زیادہ 3 سال ہو گی، جس کی تجدید چیئرمین کی منظوری سے مشروط ہو گی۔ اگرچہ ابتدائی طور پر اس بورڈ کا مقصد غزہ کی بحالی کے امور کی نگرانی بتایا گیا تھا، تاہم اس کے چارٹر میں اس کے دائرۂ کار کو صرف غزہ تک محدود نہیں کیا گیا۔
واضح رہے کہ اس سے قبل متحدہ عرب امارات (یو اے ای) کے صدر شیخ محمد بن زاید النہیان نے بھی امریکی صدر ڈونلڈ ٹرمپ کی جانب سے پیش کی گئی بورڈ آف پیس میں شمولیت کی دعوت قبول کی تھی۔
امریکی صدر ڈونلڈ ٹرمپ نے غزہ کے لیے بورڈ آف پیس میں وزیر اعظم پاکستان شہباز شریف کو بھی شمولیت کی دعوت دی ہے۔
The post امارات کے بعد بحرین نے بھی ٹرمپ کے بورڈ آف پیس میں شمولیت کی دعوت قبول کر لی appeared first on شیعہ نیوز پاکستان.
