شیعہ نیوز: پاکستان میں ایران کے سفیر رضا امیری مقدم نے کہا ہے کہ اگر ایران پر حملہ کیا گیا تو یہ صرف ایران پر نہیں بلکہ پوری مسلم دنیا پر حملہ تصور ہوگا۔ اسلام آباد میں پریس کانفرنس کرتے ہوئے ایرانی سفیر رضا امیری مقدم نے واضح کیا کہ ایران جنگ نہیں چاہتا اور اب بھی امید ہے کہ صورتِ حال جنگ کی طرف نہیں جائے گی، تاہم اگر ایران پر حملہ کیا گیا تو یہ صرف ایران پر نہیں بلکہ پوری مسلم دنیا پر حملہ تصور ہوگا۔
رضا امیری مقدم نے ایران میں حالیہ پرتشدد مظاہروں کا ذکر کرتے ہوئے کہا کہ ایران میں دہشت گرد کارروائیوں کے دوران بڑے پیمانے پر جانی و مالی نقصان ہوا۔ پرتشدد واقعات میں 2 ہزار سکیورٹی اہلکاروں سمیت 3 ہزار سے زائد افراد جاں بحق ہوئے۔
ایرانی سفیر رضا امیری مقدم نے کہا کہ کارروائیوں میں 690 دہشت گرد بھی مارے گئے۔
یہ بھی پڑھیں : میانوالی، 6 خطرناک دہشت گرد اپنے ہی ساتھیوں کی فائرنگ سے ہلاک، لشکر جھنگوی کے دہشت گرد ہونے کا شبہ
انہوں نے کہا کہ ایران جنگ کا خواہاں نہیں ہے لیکن متوازن مذاکرات پر یقین رکھتا ہے۔ ملک کی صورتحال معمول پر ہے اور غیر ملکیوں کے لیے محفوظ ہے۔
انہوں نے کہا کہ معاشی پابندیوں اور ڈالر کی سبسڈی ختم ہونے سے مہنگائی اور کرنسی کی قدر میں کمی کی وجہ سے 28 دسمبر سے 8 جنوری تک احتجاجات ہوئے، جو ابتدائی طور پر پُرامن تھے لیکن بعد میں منظم فسادات میں بدل گئے۔
سفیر نے کہا کہ ان کے پاس امریکہ اور اسرائیل کی ان فسادات میں مداخلت، عدم تحفظ پیدا کرنے اور قتل عام کے منصوبے کے مضبوط ثبوت موجود ہیں۔ فسادیوں نے عوامی املاک، مساجد، بینکوں اور اسکولوں کو نقصان پہنچایا۔
انہوں نے زور دیا کہ ایرانی عوام کی بڑے پیمانے پر مظاہروں نے اس “مغربی سازش” کو ناکام بنا دیا۔ فسادیوں کی اکثریت کو گرفتار کر لیا گیا ہے اور علیحدگی پسند گروہوں کو کاری ضرب لگی ہے۔
سفیر نے کہا کہ امریکہ میں ایران پر حملے کی طاقت نہیں ہے اور فوجی دکھاوے محض توجہ ہٹانے کی کوشش ہے۔ ایران کبھی طاقت کے آگے نہیں جھکے گا اور اپنا دفاع کرنے کی صلاحیت رکھتا ہے۔ انہوں نے 12 روزہ مسلط جنگ سے پہلے ہونے والے مذاکرات کا حوالہ دیا جہاں امریکہ نے مذاکراتی میز چھوڑ کر حملہ کیا تھا۔
انہوں نے پاکستان کی صلح کی کوششوں کی تعریف کی اور کہا کہ تعلقات اچھے ہیں اور یقین ہے کہ پاکستان ایران کے خلاف کسی جارحیت میں حصہ نہیں لے گا۔
انہوں نے یہ بھی کہا کہ صورت حال پر مسلسل نظر رکھی جا رہی ہے، امریکا کے مطالبات قابل قبول نہیں۔ ایرانی سفیر نے پاکستانی حکومت کی طرف سے ایران کی حمایت پر تشکر کا اظہار کیا۔
انہوں نے کہا کہ وزیراعظم شہباز شریف اور نائب وزیراعظم اسحاق ڈار کی قیادت میں پاکستان نے اصولی مؤقف اپنایا اور کشیدگی میں کمی کے لیے مخلصانہ کردار ادا کیا۔
ایرانی سفیر نے جنیوا میں پاکستان کے مستقل مشن کی پیشہ وارانہ کاوشوں کو قابلِ ستائش قرار دیا اور کہا کہ پاکستان کی یہ حمایت ایران ہمیشہ قدر و احترام کیساتھ یاد رکھے گا۔
The post امریکہ میں ایران پر حملے کی طاقت نہیں، اسلام آباد میں متعین ایرانی سفیر رضا امیری مقدم کا اہم بیان appeared first on شیعہ نیوز پاکستان.
