شیعہ نیوز: امریکہ نے قطر اور بحرین سے سینکڑوں فوجیوں کو نکال لیا ہے۔ نیویارک ٹائمز نے جمعہ کو پینٹاگون کے گمنام ذرائع کے حوالے سے رپورٹ دی ہے کہ قطر کے العدید ایئر بیس سے سینکڑوں امریکی فوجیوں کو نکال لیا گیا ہے۔ رپورٹ میں یہ بھی بتایا گیا ہے کہ بحرین سے بھی فورسز کا انخلا کیا گیا ہے، جہاں امریکی بحریہ کے پانچویں بیڑے کا مرکز واقع ہے۔ امریکی افواج اب بھی عراق، شام، کویت، سعودی عرب، اردن اور متحدہ عرب امارات کے اڈوں پر تعینات ہیں۔ اس انخلاء کو ایران پر ممکنہ امریکی حملے کے حوالے سے بڑھتی ہوئی کشیدگی کے درمیان ایک احتیاطی اقدام کے طور پر دیکھا جا رہا ہے، کیونکہ یہ خدشہ ہے کہ تہران خطے میں موجود امریکی افواج پر جوابی حملہ کر سکتا ہے۔ امریکی فوج کی سینٹرل کمانڈ ، جس کے دائرہ اختیار میں ایران اور اس کے گردونواح کا بڑا علاقہ آتا ہے، نے اس معاملے پر تبصرہ کرنے کی درخواست کا فوری طور پر کوئی جواب نہیں دیا۔ دوسری جانب جمعرات کو اقوام متحدہ کے سیکرٹری جنرل کے نام ایک خط میں، اقوام متحدہ میں ایرانی مشن کے سربراہ نے کہا کہ اگر ایران پر حملہ ہوا تو “خطے میں دشمن قوت کے تمام اڈے، تنصیبات اور اثاثے جائز اہداف تصور کیے جائیں گے اور کسی بھی غیر متوقع اور بے قابو نتائج کی مکمل اور براہِ راست ذمہ داری امریکہ پر ہو گی۔” یاد رہے کہ العدید ایئربیس مشرق وسطیٰ میں امریکہ کا سب سے بڑا فوجی اڈہ ہے، جہاں 10,000 اہلکار تعینات ہیں۔
The post امریکہ نے قطر اور بحرین سے سینکڑوں فوجیوں کو نکال لیا، نیویارک ٹائمز appeared first on شیعہ نیوز پاکستان.
