شیعہ نیوز: سی بی ایس نیوز نیٹ ورک نےاپنی ایک رپورٹ میں بتایا ہے کہ امریکہ کے انٹرسیپٹر میزائلوں کے ذخائر کی بحالی میں کئي سال کا وقت لگے گا۔
رپورٹ کے مطابق امریکی نیوز نیٹ ورک سی بی ایس نے اپنی ایک رپورٹ میں بتایا ہے کہ یوکرین کو ہتھیاروں کی منتقلی، صیہونی حکومت کے دفاع کے لیے ان کے استعمال اور مشرق وسطیٰ میں جھڑپوں کے دوران بڑے پیمانے پر استعمال کے سبب امریکا کے پیٹریاٹ اور تھاڈ انٹرسیپٹر میزائلوں کے ذخائر بہت کم ہو گئے ہیں۔
رپورٹ میں کہا گیا ہے کہ امریکا کے انٹرسیپٹر میزائلوں کے ذخائر کی بحالی میں برسوں لگ سکتے ہیں اور 2030 تک اس ملک کو ان ذخائر کی کمی کا سامنا رہے گا۔
سی بی ایس کی رپورٹ میں کہا گیا ہے کہ امریکی فوج کے سابق چیف آف اسٹاف رینڈی جارج نے گزشتہ سال دسمبر میں اور اسلامی جمہوریۂ ایران کے خلاف امریکہ اور صیہونی حکومت کی مشترکہ فوجی جارحیت شروع ہونے سے تقریباً دو ماہ قبل امریکہ میں دفاعی میزائلوں کے ذخائر کی کمی کے بارے میں خبردار کیا تھا۔
انھوں نے کہا تھا کہ امریکہ کے پیٹریاٹ اور تھاڈ میزائلوں کے ذخائر 2030 تک بھی فوجی تیاری برقرار رکھنے کے لیے درکار ضروری سطح سے کم رہیں گے۔
یہ بھی پڑھیں : نرسیں، رحمت و امید کے فرشتے، نرس ڈے کی مناسبت سے آیت اللہ سید مجتبیٰ خامنہ ای کا پیغام
اس رپورٹ کے مطابق، 2022 میں یوکرین میں جنگ شروع ہونے کے بعد وہاں پیٹریاٹ میزائلوں کی منتقلی، صیہونی حکومت کے دفاع کے لیے ان میزائلوں کا استعمال اور امریکی دفاعی صنعت کی پیداواری صلاحیت کی محدودیت، ذخائر میں کمی کے اسباب ہیں۔
رپورٹ میں امریکی اسٹریٹجک اور بین الاقوامی اسٹڈیز (CSIS) کے تخمینے کا حوالہ دیتے ہوئے مزید کہا گیا ہے کہ ایران کے خلاف جنگ شروع ہونے سے پہلے امریکہ کے پاس تقریباً 2,300 پیٹریاٹ انٹرسیپٹر میزائل تھے اور جنگ کے دوران اس نے ان میں سے قریب ایک سے ڈیڑھ ہزار میزائل استعمال کیے جو تقریباً نصف سے دو تہائی بنتے ہیں۔
سی بی ایس کی رپورٹ میں مزید کہا گیا ہے کہ مشرق وسطیٰ کی جھڑپوں کے دوران امریکہ کے تھاڈ انٹرسیپٹر میزائلوں کے ذخائر کا بھی تقریباً 82 فیصد استعمال ہو چکا ہے۔
رپورٹ میں کہا گيا ہے کہ سی ایس آئی ایس کے اندازوں کے مطابق تھاڈ انٹرسیپٹر میزائلوں کے نئے آرڈرز کی فراہمی میں اوسطاً ساڑھے چار سال جبکہ پیٹریاٹ میزائلوں کی فراہمی میں تقریباً ساڑھے تین سال لگتے ہیں۔
رپورٹ کے مطابق، اگر مشرق وسطیٰ یا دیگر تنازعات میں ان میزائلوں کا مزید استعمال روک بھی دیا جائے، تب بھی امریکہ کے ذخائر کو دسمبر 2025 کی سطح پر بحال کرنے میں 2030 تک کا وقت لگ سکتا ہے۔
The post امریکہ کے انٹرسیپٹر میزائلوں کے ذخائر کی بحالی میں برسوں لگیں گے، سی بی ایس appeared first on شیعہ نیوز پاکستان.
