شیعہ نیوز: اسلامی مزاحمتی تحریک حماس نے اعلان کیا ہے کہ غزہ کی پٹی میں اقتدارانتظامی امور قومی کمیٹی کے سپرد کرنے کے لیے تمام تر حکومتی اور انتظامی انتظامات مکمل کر لیے گئے ہیں۔
حماس کے ترجمان حازم قاسم نے اناطولیہ نیوز ایجنسی کو دیے گئے ایک بیان میں کہا کہ غزہ کی پٹی میں حکومتی اور انتظامی حکام کی جانب سے تمام ضروری اقدامات اور انتظامات مکمل کر لیے گئے ہیں تاکہ تمام اختیارات اور وسائل غزہ کی پٹی کے انتظام کے لیے قائم آزاد قومی کمیٹی کے حوالے کیے جا سکیں۔
انہوں نے مزید کہا کہ جیسے ہی یہ کمیٹی غزہ کی پٹی کی سرزمین پر پہنچے گی تمام شعبوں میں شفاف اور جامع انداز میں منتقلی کا عمل شروع کر دیا جائے گا۔
یہ بھی پڑھیں : امریکہ کا مقابلہ کرنے اور انہیں انتقامی طمانچہ لگانے کے لیے مکمل طور پر تیار ہیں، جنرل عبدالرحیم موسوی
غزہ کے انتظام کے لیے قائم قومی کمیٹی ایک غیر سیاسی ادارہ ہے جو روزمرہ کے سول سروسز کے معاملات کو چلانے کا ذمہ دار ہوگا، یہ کمیٹی اپنے سربراہ علی شعث سمیت 11 فلسطینی شخصیات پر مشتمل ہے۔
اس کمیٹی نے گذشتہ ماہ وسط جنوری سنہ 2026ء سے مصری دارالحکومت قاہرہ سے اپنے کام کا آغاز کیا تھا، تاہم غزہ کی پٹی میں اب تک اس کی سرگرمیاں شروع نہیں ہو سکی ہیں جہاں 24 لاکھ فلسطینی اسرائیلی نسل کشی کے باعث انتہائی تباہ کن حالات میں زندگی گزار رہے ہیں۔
حازم قاسم نے اپنی بات جاری رکھتے ہوئے کہا کہ اس منتقلی کے عمل کی نگرانی کے لیے ایک اعلیٰ کمیٹی تشکیل دی گئی ہے جو فلسطینی دھڑوں، قبائلی عمائدین، سول سوسائٹی کے رہنماؤں اور عالمی اداروں سے وابستہ شخصیات پر مشتمل ہے۔
انہوں نے مزید کہا کہ ہم اقتدار کی ایک شفاف، مکمل اور مثالی منتقلی کے عمل کے شاہد ہوں گے، انہوں نے تمام فریقین سے اپیل کی کہ وہ کمیٹی کے کام میں سہولت فراہم کریں تاکہ دو سالہ وحشیانہ نسل کشی کی جنگ سے ہونے والی تباہی کے بعد پٹی کی بحالی کا آغاز ہو سکے۔
اس سے قبل حازم قاسم نے صحافیوں سے گفتگو میں اشارہ کیا تھا کہ دھڑوں، قبائل اور سول سوسائٹی کی ایک کمیٹی حکومتی اور انتظامی امور قومی کمیٹی کے حوالے کرنے کے عمل کی نگرانی کرے گی۔
The post انتظامی امور قومی کمیٹی کے سپرد کرنے کے لیے حکومتی انتظامات مکمل کرلیے ہیں، حازم قاسم appeared first on شیعہ نیوز پاکستان.
