شیعہ نیوز: اردن کی وزارت خارجہ اور امور تارکین وطن نے اسرائیلی وزیر برائے قومی سکیورٹی ایتمار بن گویر کی جانب سے مسجد اقصیٰ پر دھاوے کی شدید الفاظ میں مذمت کی ہے اور اس قدم کو بین الاقوامی قانون اور بین الاقوامی انسانی قانون کی کھلی خلاف ورزی قرار دیا ہے۔
وزارت نے ایک سرکاری بیان میں اس دھاوے کو قطعی طور پر مسترد کرتے ہوئے اسے مسجد اقصیٰ کی حرمت اور وہاں کے تاریخی و قانونی طور پر رائج “اسٹیٹس کو” کی پامالی قرار دیا ہے۔
وزارت خارجہ کے سرکاری ترجمان فواد المجالی نے زور دے کر کہا کہ اسرائیلی حکام مسجد اقصیٰ میں زمانی اور مکانی تقسیم مسلط کرنے کی کوشش کر رہے ہیں۔
انہوں نے اس عزم کا اعادہ کرد کہ مقبوضہ القدس اور اس کے اسلامی و مسیحی مقدسات پر قابض اسرائیل کی کوئی خود مختاری تسلیم نہیں کی جائے گی۔
یہ بھی پڑھیں : مسجد اقصیٰ پر بن گویر کا دھاوا قابض دشمن کی خود مختاری مسلط کرنے کا خطرناک ترین طریقہ کار ہے، حماس
المجالی نے نمازیوں کے لیے مسجد اقصیٰ کی مسلسل تالا بندی اور عبادت کی آزادی پر پابندیوں کی دوبارہ مذمت کی، جو ایک قابض قوت کے طور پر بین الاقوامی ذمہ داریوں کی صریح خلاف ورزی ہے۔ انہوں نے ان اقدامات کے جاری رہنے سے پیدا ہونے والے سنگین نتائج سے بھی خبردار کیا۔
انہوں نے اس حقیقت کی طرف اشارہ کیا کہ مسجد اقصیٰ اپنی 144 کنال کی تمام تر وسعت کے ساتھ صرف اور صرف مسلمانوں کی عبادت گاہ ہے، اور اردنی وزارت اوقاف سے وابستہ القدس اوقاف کا ادارہ ہی وہ واحد قانونی اتھارٹی ہے جو اس کے معاملات چلانے اور وہاں داخلے کو منظم کرنے کا اختیار رکھتا ہے۔
واضح رہے کہ ایتمار بن گویر نے قابض افواج کی بھاری نفری کے حصار میں باب المغاربہ کے راستے مسجد اقصیٰ کے صحنوں پر دھاوا بولا اور باب السلسلہ تک اشتعال انگیز گشت کرنے کے بعد وہاں سے روانہ ہوا۔
The post ایتمار بن گویر کا مسجد اقصیٰ پر دھاوا بین الاقوامی قانون کی سنگین خلاف ورزی ہے، اردن appeared first on شیعہ نیوز پاکستان.
