شیعہ نیوز: میری پہچان پاکستان کے سربراہ اورسابق گورنر سندھ ڈاکٹر عشرت العباد خان نے کہا ہے کہ دنیا اس وقت ایک نازک معاشی اور سیاسی دور سے گزر رہی ہے، اگر ایران اور امریکہ کے درمیان معاہدہ نہ ہوا تو اس کے اثرات براہ راست عالمی مہنگائی، توانائی بحران اور ترقی پذیر ممالک پر پڑیں گے، دنیا کو ضد نہیں بلکہ لچک، حکمت اور ذمہ دار قیادت کی ضرورت ہے کیونکہ عالمی معیشت مزید دبا برداشت نہیں کر سکتی۔ کراچی، حیدرآباد، میرپورخاص اور سکھر کے اہم اجلاسوں سے خطاب کرتے ہوئے انہوں نے کہا کہ پاکستان جیسے ممالک پہلے ہی مہنگائی اور معاشی مشکلات کا سامنا کر رہے ہیں، اس لیے کامیاب سفارت کاری ناگزیر ہے۔ انہوں نے امید ظاہر کی کہ پاکستان کی قیادت موجودہ حالات میں قوم کو جلد خوشخبری دے گی۔
یہ بھی پڑھیں : معرکہ حق کی پہلی سالگرہ، جامعہ عروۃ الوثقیٰ کے طلاب کا واہگہ بارڈ کا دورہ،پاک فوج سے اظہاریکجہتی
ڈاکٹر عشرت العباد خان نے کہا کہ اختلافات بھلا کر قومی یکجہتی کا مظاہرہ کرنا ہوگا، ہمیں سیاست نہیں بلکہ ریاست کو ترجیح دینا چاہیئے۔ ان کا کہنا تھا کہ بدانتظامی نے صوبوں کو بند گلی میں لاکھڑا کیا ہے، آئینی اور انتظامی اصلاحات وقت کی اہم ضرورت ہیں۔ انہوں نے سندھ کی صورتحال پر تشویش ظاہر کرتے ہوئے کہا کہ اگر صوبے میں نفرتوں کا سلسلہ بند ہو جائے، حقداروں کے حقوق نہ مارے جائیں اور میرٹ کو یقینی بنایا جائے تو سندھ کو ماڈل صوبہ بنایا جا سکتا ہے، تاہم متعصبانہ سوچ ملک اور صوبے کے لیے زہر قاتل ہے۔ انہوں نے کہا کہ کراچی میں ہیوی ٹریفک شہریوں کی جانیں لے رہی ہے، خواتین اور نوجوان روز حادثات کا شکار ہو رہے ہیں، شہر میں ڈاکو راج قائم ہے، زمینوں پر قبضے ہو رہے ہیں اور لینڈ مافیا کے خلاف آواز اٹھانے والوں کو خاموش کرایا جا رہا ہے۔
The post ایران امریکا معاہدہ نہ ہوا تو دنیا مہنگائی اور توانائی بحران کی لپیٹ میں آ سکتی ہے، سابق گورنرعشرت العباد appeared first on شیعہ نیوز پاکستان.
