شیعہ نیوز: جماعت اسلامی پاکستان کے نائب امیر لیاقت بلوچ نے کہا ہے کہ پاکستان تحریک انصاف ایک طرف اسٹیبلشمنٹ کے خلاف ملک گیر بیانیہ بنانے کے لیے آئے روز جلسوں اور احتجاج کا اعلان کرتی ہے، جبکہ دوسری طرف اسی اسٹیبلشمنٹ کی بدولت گزشتہ 14 برسوں سے خیبرپختونخوا میں برسر اقتدار ہے، جہاں اس کی کارکردگی سوالیہ نشان بنی ہوئی ہے۔ انہوں نے کہا کہ بھارت نے خطے کے بیشتر ممالک کے ساتھ کشیدہ تعلقات اختیار کر رکھے ہیں، جس کے باعث وہ تنہائی کا شکار ہو رہا ہے۔ امریکہ اور ایران کے درمیان جاری کشیدگی کے تناظر میں خطے کی صورتحال مزید پیچیدہ ہو گئی ہے، تاہم پاکستان اپنی بہترین جغرافیائی محلِ وقوع کی بدولت نہ صرف خطے میں اہمیت اختیار کر چکا ہے بلکہ اسے اہم سفارتی کردار ادا کرنے کا موقع بھی ملا ہے۔ امن مذاکرات کے نتیجے میں عالمی سطح پر پاکستان کے وقار میں تاریخی اضافہ ہوا ہے، اور پوری قوم ان مذاکرات کی کامیابی کے لیے نیک خواہشات رکھتی ہے۔
ان خیالات کا اظہار انہوں نے جماعت اسلامی پاکستان کے زیر اہتمام ضلع پشاور اور ضلع چارسدہ کے کارکنان کے لیے منصورہ لاہور میں منعقد ہونے والے مرکزی سہ روزہ تربیتی اجتماع کے پشاور منتقل ہونے کے بعد صوبائی ہیڈکوارٹر مرکز اسلامی سردار گڑھی میں تربیت گاہ کے شرکاء سے خطاب کرتے ہوئے کیا۔ اس موقع پر جماعت اسلامی کے صوبائی جنرل سیکرٹری صابر حسین اعوان، مرکزی شوریٰ کے رکن و امیر ضلع پشاور بحراللہ خان ایڈووکیٹ، اور امیر ضلع چارسدہ شاہ حسین ایڈووکیٹ بھی موجود تھے۔ لیاقت بلوچ نے کہا کہ پاکستان اس وقت متعدد سیکیورٹی اور داخلی خطرات سے دوچار ہے۔ پاکستان اور افغانستان کے درمیان کشیدگی دونوں ممالک کے امن کے لیے خطرہ ہے، جبکہ افغانستان کی سرزمین پاکستان کے خلاف دہشت گردی کے لیے استعمال ہو رہی ہے، جسے فوری طور پر بند ہونا چاہیے۔
انہوں نے مزید کہا کہ ملک میں جاری سیاسی بحران کے باعث سیاست بند گلی میں داخل ہو چکی ہے۔ موجودہ حکمرانوں کے اقتدار میں آنے میں اسٹیبلشمنٹ کا کردار رہا ہے۔ ملک میں رشوت اور کرپشن عروج پر ہے، قومی اداروں کی کارکردگی متاثر ہو رہی ہے، جبکہ تحریک انصاف کے اندرونی اختلافات کے باعث نہ صرف پارٹی بلکہ ملک میں بھی انتشار بڑھ رہا ہے۔ انہوں نے کہا کہ خیبر پختونخوا میں تحریک انصاف کی 14 سالہ کارکردگی سوالیہ نشان ہے۔ تحریک انصاف کے کارکنان سوشل میڈیا پر مخالفین کی کردار کشی کرتے ہیں، جبکہ ماضی میں اسی جماعت نے اسٹیبلشمنٹ کو مضبوط کرنے میں کردار ادا کیا اور آج اسی پر تنقید کر رہی ہے۔ لیاقت بلوچ نے کہا کہ قائداعظم محمد علی جناح نے اسرائیل کو ناجائز ریاست قرار دیا تھا۔ امریکہ اور اسرائیل کی جانب سے ایران پر حملوں کی شدید مذمت کرتے ہوئے انہوں نے کہا کہ ایران نے بیرونی حملوں کا مؤثر انداز میں مقابلہ کیا ہے۔ خطے میں بڑی طاقتوں کی مداخلت سے حالات مزید پیچیدہ ہو رہے ہیں۔
یہ بھی پڑھیں : ایران کی بحری ناکہ بندی، امریکا کا اپنے لیے کھودا ہوا گڑھا | تحریر: اکبر عیسیٰ زادہ
انہوں نے کہا کہ بنگلادیش میں جماعت اسلامی کے خلاف طویل عرصے سے جاری انتقامی کارروائیوں کے خلاف عوام کھڑے ہو چکے ہیں، جس سے خطے کی سیاست میں تبدیلی آ رہی ہے۔ موجودہ حالات میں پاکستان کی جغرافیائی اہمیت مزید بڑھ گئی ہے۔ انہوں نے کہا کہ سی پیک منصوبہ خطے کی ترقی کے لیے نہایت اہم ہے، جبکہ پائیدار امن کے لیے پاکستان، افغانستان، ایران اور چین کے درمیان تعاون ناگزیر ہے۔ گوادر کی گہری بندرگاہ پاکستان کا ایک بڑا اثاثہ ہے، جو مستقبل میں توانائی بحران کے حل میں کلیدی کردار ادا کرے گی۔ انہوں نے کہا کہ سارک کو غیر فعال کرنا خطے کے لیے نقصان دہ ثابت ہوا ہے۔ ملک میں مہنگائی، بدامنی اور بے روزگاری میں اضافہ تشویشناک ہے۔ کرپشن کے خاتمے کے لیے مؤثر اقدامات کی ضرورت ہے، جبکہ بجلی کی لوڈشیڈنگ اور تیل کی بڑھتی قیمتیں عوام کے لیے بڑا مسئلہ ہیں۔ انہوں نے حکومت سے مطالبہ کیا کہ عالمی مارکیٹ میں خام تیل کی قیمتوں میں کمی کا فائدہ فوری طور پر عوام کو منتقل کرتے ہوئے پیٹرولیم مصنوعات کی قیمتیں کم کی جائیں۔
The post ایران نے بیرونی حملوں کا مؤثرانداز میں مقابلہ کیا ہے، نائب امیر جماعت اسلامی لیاقت بلوچ appeared first on شیعہ نیوز پاکستان.
