شیعہ نیوز: سربراہ شیعہ علماء کونسل پاکستان علامہ سید ساجد علی نقوی نے تین جمادی الاخریٰ کی مناسبت سے اپنے پیغام میں کہا ہے کہ بنتِ رسول اکرم صلی اللہ علیہ وآلہ وسلم، سیدہ فاطمہ الزہرا سلامُ اللهِ عليها آیتِ تطہیر کا مصداق اور سیدۃ النساء ہیں۔ بیٹی کی حیثیت سے رحمت العالمین صلی اللہ علیہ وآلہ وسلم جیسی ہستی کے لیے باعثِ رحمت قرار پائیں۔
شادی کے بعد بیوی اور ماں کی حیثیت سے جس طرزِ زندگی کا نمونہ پیش کیا، وہ طبقۂ نسواں کے لیے مثالی حیثیت رکھتا ہے۔ آپ ؑ نے اپنے گھر کے تمام کام خود انجام دیے، بچوں کی تربیت کی، کنیز سے برابری اور دوست جیسا سلوک کیا۔ امیرالمومنین ؑ جیسے شوہر کے ساتھ کاموں کی تقسیم آپ کا وطیرہ تھا۔ علی ابن ابی طالب ؑ جیسے شجاع و سخی شوہر کے ہوتے ہوئے اطاعت، تابعداری اور خدمت کو شعار بنایا۔ کوئی فرمائش نہ کی اور اسی طرح جوانانِ جنت کے سردار فرزندان کی مادرِ گرامی ہوتے ہوئے فاقہ کشی کی زندگی کو ترجیح دی۔
صدیقہ، طاہرہ اور بتول جیسے القابات کی حامل بی بی سلامُ اللهِ عليها نے اطاعتِ خداوندی، علم و کمال، عفت و پاک دامنی، حیا، تربیتِ اولاد، اعلیٰ تہذیب و اخلاقی اقدار اور قناعت پسندی کے ذریعے مثالی اسلامی معاشرے کی بنیادیں فراہم کیں۔
علامہ سید ساجد علی نقوی کا مزید کہنا ہے کہ آج کی خواتین جدید دور کے تقاضوں کو سیدہ ؑ کے کردار کے نقوش کی روشنی میں زندگی کا حصہ بنائیں۔ خاص طور پر مسلم معاشرہ ازدواج اور شادی جیسے اہم مسئلے میں بھی حضرت زہرا سلامُ اللهِ عليها جیسی ہستی کی سیرت کو نمونۂ عمل قرار دے، تاکہ تمام مفاسد، بے راہ روی اور انتشار سے بچ کر اخروی نجات حاصل کی جا سکے۔
The post بنتِ رسول اکرم صلی اللہ علیہ وآلہ وسلم، سیدہ فاطمہ الزہرا سلامُ اللهِ عليها آیتِ تطہیر کا مصداق اور سیدۃ النساء ہیں،علامہ ساجد علی نقوی appeared first on شیعہ نیوز پاکستان.
