شیعہ نیوز: ترک وزیرخارجہ نے حماس کے اعلی رہنماوں سے ملاقات کے دوران فلسطینی عوام کے حقوق کی حمایت جاری رکھنے اور غزہ کے لیے انسانی امداد بڑھانے کا اعلان کیا۔
رپورٹ کے مطابق ترکی کے وزیر خارجہ حاکان فیدان نے انقرہ میں حماس کے ایک اعلی سطحی وفد سے ملاقات کی جس کی قیادت خلیل الحیہ کر رہے تھے۔
تفصیلات کے مطابق، فیدان اور حماس کے رہنماؤں کی ملاقات میں غزہ کی موجودہ صورت حال کا جائزہ لیا گیا اور امن منصوبے کے دوسرے مرحلے پر تبادلہ خیال کیا گیا۔
یہ بھی پڑھیں : متحدہ عرب امارات کی یمن میں سرگرمیاں، بندرگاہوں اور جنوبی علاقوں پر قبضہ، اثر و رسوخ بڑھانے کی کوشش
اس موقع پر حاکان فیدان نے واضح کیا کہ ترکی ہر سطح پر فلسطینی عوام کے حقوق کی بھرپور حمایت جاری رکھے گا اور غزہ میں رہائش کی فراہمی اور انسانی امداد کے اقدامات کو مزید وسعت دے گا۔
حماس کے وفد نے ملاقات کے دوران کہا کہ تنظیم جنگ بندی معاہدے کی پابندی کر رہی ہے، تاہم اسرائیل کی جانب سے غزہ پر مسلسل حملے امن منصوبے کے دوسرے مرحلے میں پیش رفت کی راہ میں رکاوٹ بن رہے ہیں۔
حماس کے نمائندوں نے بتایا کہ امدادی سامان لے جانے والے صرف ساٹھ فیصد ٹرکوں کو غزہ میں داخلے کی اجازت ملی ہے، جو بنیادی ضروریات پوری کرنے کے لیے ناکافی ہے۔
گفتگو کے دوران حماس کے وفد نے غزہ میں ادویات، تعمیراتی سامان، ایندھن اور دیگر ضروری اشیاء کی شدید کمی کی طرف توجہ دلائی اور خبردار کیا کہ یہ صورت حال بحران کو مزید سنگین بنا رہی ہے۔
ملاقات میں فریقین نے فلسطینی دھڑوں کے درمیان ہونے والے معاہدے اور مغربی کنارے کی صورت حال پر بھی بات چیت کی۔
The post ترک وزیر خارجہ کی حماس کے اعلٰی سطحی وفد سے ملاقات، غزہ کے لیے انسانی امداد بڑھانے کا اعلان appeared first on شیعہ نیوز پاکستان.
