شیعہ نیوز: چیئرمین مجلس وحدت مسلمین پاکستان علامہ راجہ ناصرعباس جعفری نے سکردو پریس کلب میں صحافیوں سے گفتگو کرتے ہوئے کہا کہ گلگت بلتستان کے انتخابات ایک اہم مرحلے میں داخل ہو چکے ہیں جہاں عوام کی تمام تر توجہ شفاف، آزاد اور منصفانہ انتخابی عمل پر مرکوز ہے۔ جمہوریت کی اصل روح عوامی مینڈیٹ کے احترام میں پنہاں ہوتی ہے، لیکن افسوس کے ساتھ یہ حقیقت بھی موجود ہے کہ ملک میں حقیقی جمہوری روایات کو فروغ دینے کے بجائے عوامی رائے پر اثرانداز ہونے اور مینڈیٹ کو مسخ کرنے کی شکایات بارہا سامنے آتی رہی ہیں۔ یہی خدشات آج گلگت بلتستان کے انتخابی ماحول میں بھی محسوس کیے جا رہے ہیں، جس کے باعث عوام اپنے حقِ رائے دہی کے تحفظ اور انتخابی شفافیت کے حوالے سے فکرمند دکھائی دیتے ہیں۔
انہوںنے کہا کہ سیاسی میدان میں اصولوں اور نظریات کے بجائے ذاتی مفادات کی بنیاد پر وفاداریاں تبدیل کرنے کا رجحان بھی جمہوری اقدار کے لیے ایک سنجیدہ چیلنج بن چکا ہے۔ ایسے حالات میں عوام ان قیادتوں کی جانب امید بھری نظروں سے دیکھتے ہیں جو ذاتی مفاد کے بجائے عوامی خدمت، خطے کی ترقی اور عوامی اعتماد کو اپنی سیاسی جدوجہد کا محور بنائیں۔گلگت بلتستان کے عوام کو درپیش مسائل، نوجوانوں کے حقوق اور شہری آزادیوں کا تحفظ بھی اہم قومی موضوعات میں شامل ہیں۔ حالیہ عرصے میں گرفتار ہونے والے نوجوانوں کے معاملے پر شدید تشویش پائی جاتی ہے۔ ان نوجوانوں کے ساتھ ہونے والے ظلم، جبر اور ناانصافی کے خلاف سینیٹ آف پاکستان میں بھرپور آواز اٹھائی جائے گی تاکہ ان کے حقوق کا تحفظ یقینی بنایا جا سکے اور انصاف کی فراہمی کے لیے مؤثر کردار ادا کیا جا سکے۔ یہ نوجوان پاکستان کے فطری دفاع اور قومی سلامتی کی مضبوط علامت ہیں، اس لیے انہیں دیوار سے لگانے یا ان کے جائز حقوق سے محروم کرنے کی کوششیں نہ صرف خطے کے عوام کے جذبات کو مجروح کرتی ہیں بلکہ قومی مفاد کے بھی منافی ہیں۔
یہ بھی پڑھیں : امام محمد باقرؑ نےایسی علمی تحریک کی بنیاد رکھی جس کے اثرات آج بھی پوری امت مسلمہ میں نمایاں ہیں، علامہ ساجد نقوی
ان کا مزید کہنا تھا کہ گلگت بلتستان کے غیور عوام کے مسائل اور مطالبات کو نظر انداز کرنے کے بجائے ہر مؤثر فورم پر اٹھانا اور ان کے حل کے لیے عملی اقدامات کرنا وقت کی اہم ضرورت ہے۔ اسی طرح انتخابات میں کسی بھی قسم کی دھاندلی یا غیر شفافیت عوامی اعتماد کو نقصان پہنچانے کے ساتھ ساتھ ملکی استحکام اور جمہوری عمل کے لیے بھی نقصان دہ ثابت ہو سکتی ہے۔دوسری جانب خطے کی قومی وحدت، مذہبی ہم آہنگی اور سماجی یکجہتی کا تحفظ پہلے سے کہیں زیادہ اہم ہو چکا ہے۔ گلگت بلتستان مختلف مکاتبِ فکر اور برادریوں کا حسین امتزاج ہے، جہاں شیعہ، سنی، نوربخشی اور اسماعیلی صدیوں سے باہمی احترام، رواداری اور بھائی چارے کے ساتھ زندگی بسر کرتے آئے ہیں۔ موجودہ حالات اس امر کے متقاضی ہیں کہ تمام طبقات اختلافات سے بالاتر ہو کر اتحاد و یکجہتی کا مظاہرہ کریں، مشترکہ مفادات کے تحفظ کے لیے ایک آواز بنیں اور خطے کی وحدت کو پارہ پارہ کرنے کی ہر کوشش کو ناکام بنائیں، تاکہ گلگت بلتستان ترقی، امن اور استحکام کی راہ پر مزید مضبوطی کے ساتھ آگے بڑھ سکے۔
The post جی بی انتخابات میں کسی بھی قسم کی دھاندلی ملکی استحکام اور جمہوری عمل کے لیے بھی نقصان دہ ثابت ہو سکتی ہے،سینیٹرعلامہ راجہ ناصرعباس appeared first on شیعہ نیوز پاکستان.
