شیعہ نیوز: سکردو میں صدر انجمنِ امامیہ بلتستان علامہ آغا سید باقر الحسینی کی صدارت میں کابینہ کی اہم میٹنگ منعقد ہوئی، جس میں خطے کی مجموعی صورتحال، امن و امان اور عوامی امور پر تفصیلی غور کیا گیا۔ اجلاس سے خطاب کرتے ہوئے آغا سید باقر الحسینی نے واضح کیا کہ چارٹر آف ڈیمانڈ کے مطابق امریکی اور اسرائیلی شہریوں کے علاوہ کسی بھی غیر ملکی (فارنر) کے بلتستان آنے پر کوئی پابندی نہیں ہے۔ ہم بلتستان میں پائیدار امن کے خواہاں ہیں اور اس مقصد کے لیے قوم کی قربانیاں بے مثال ہیں۔ لہٰذا انتظامیہ اور متعلقہ اداروں سے مطالبہ کیا جاتا ہے کہ غیر ضروری گرفتاریوں سے گریز کیا جائے، کیونکہ اس سے عوام میں تشویش اور بے چینی پھیلتی ہے۔ بصورتِ دیگر اس کے نتائج کی ذمہ داری انتظامیہ پر عائد ہوگی۔
صدر انجمن نے نوجوانوں کو خصوصی ہدایت دیتے ہوئے کہا کہ سوشل میڈیا کا مثبت، ذمہ دارانہ اور تعمیری استعمال وقت کی اہم ضرورت ہے اور کسی بھی قسم کی منفی سرگرمی یا پروپیگنڈے سے دور رہا جائے۔ آج مختلف وفود نے صدر انجمن اور کابینہ سے ملاقات کی، جن میں مجلس وحدت مسلمین، سول سوسائٹی، ہوٹل ایسوسی ایشن اور معطل پولیس اہلکاروں کے نمائندے شامل تھے۔ ان ملاقاتوں میں بلتستان کی امن و امان کی صورتحال پر تفصیلی تبادلہ خیال کیا گیا اور علاقے میں پائیدار امن و استحکام کے لیے باہمی تعاون اور مشترکہ لائحہ عمل اپنانے کے عزم کا اعادہ کیا گیا۔
The post جی بی میں اہل تشیع کی ناجائز گرفتاریاں جاری، انجمن امامیہ بلتستان کی تشویش appeared first on شیعہ نیوز پاکستان.
