شیعہ نیوز: فلسطین کی مزاحمتی تنظیموں حماس اور جہاد اسلامی کے سینئر عہدیداروں کا ایک مشترکہ اجلاس ہوا جس میں غزہ اور مغربی کنارے میں صیہونی جرائم کا جائزہ لینے کے ساتھ ساتھ قومی اور جمہوری بنیادوں پر فلسطینیوں کی صفوں کو متحد کرنے کی ضرورت پر زور دیا گیا۔
رپورٹ کے مطابق دونوں فریقوں نے مغربی کنارے کے خلاف صیہونی حکومت کی کابینہ کے فیصلوں اور غزہ کی پٹی کے محاصرے کے تسلسل کا جائزہ لیا۔ انہوں نے انسانی امداد، ادویات، خوراک اور تعمیراتی مواد کی ترسیل میں رکاوٹیں ڈالنے کو معاہدوں کی صریح خلاف ورزی قرار دیا۔
یہ بھی پڑھیں : اسرائیلی توسیع پسندی پر ایران کا سخت ردعمل، عالمی برادری کو خبردار
اس کے علاوہ، رفح کراسنگ پر مسافروں کے ساتھ بہیمانہ سلوک اور غزہ پٹی میں “قومی انتظامی کمیٹی” کی سرگرمیوں کی راہ میں صیہونی رکاوٹوں کے معاملے پر بھی بحث ہوئی۔
مزاحمتی تنظیموں کے رہنماؤں نے یہودی بستیوں کی تعمیر اور علاقے کو یہودی رنگ دینے کے منصوبوں کے خلاف فلسطینی قوم کی استقامت کو مضبوط بنانے کی ضرورت پر زور دیا اور ساتھ ہی انہوں نے درپیش چیلنجوں کا مقابلہ کرنے کے لیے فلسطین کے اندرونی ڈھانچے کو بحال کرنے کا مطالبہ کیا۔
اس سے قبل تحریک حماس کے ترجمان نے صیہونی حکومت کے ہاتھوں غزہ میں جنگ بندی معاہدے کی خلاف ورزیوں میں اضافے پر برہمی کا اظہار کرتے ہوئے اعلان کیا تھا کہ یہ حکومت جنگ بندی کو برقرار رکھنے کی کوشش کرنے والے ثالث اور ضامن ممالک کے اقدامات کو عملی طور پر بے اثر کر رہی ہے۔
The post حماس اور جہاد اسلامی کا مشترکہ اجلاس، فلسطینیوں کی صفوں میں اتحاد پر زور appeared first on شیعہ نیوز پاکستان.
