شیعہ نیوز: سابق وزیراعظم پاکستان ذوالفقار علی بھٹو کے پوتے ذوالفقار علی بھٹو جونیئر نے کہا ہے کہ پاکستان غزہ پیس بورڈ سے الگ ہو کر ایران کا ساتھ دے، کراچی امریکن قونصل خانے کے واقعہ کے شہدا کے لواحقین کو انصاف فراہم کیا جائے، ان خیالات کا اظہار انہوں نے کراچی میں اپنی رہائش گاہ 70 کلفٹن میں پریس کانفرنس کرتے ہوئے کیا۔ ذوالفقار علی بھٹو جونیئر نے کہا کہ امریکا اور اسرائیل کی ایران پر جارحیت کیخلاف اور آیت اللہ خامنہ ای کی شہادت پر افسوس ہے، امریکن قونصل خانہ کے سانحہ میں شہداء کے لواحقین کے ساتھ ہیں، آیت اللہ خامنہ ای کی شہادت پر ردعمل میں نوجوانوں نے پُرامن احتجاج کیا۔ انہوں نے کہا کہ عالمی میڈیا کے مطابق احتجاج کرنے والوں پر امریکا کی میرین فورسز نے سیدھی فائرنگ کی، ہمارے بچے دہشتگرد نہیں، امریکہ قونصلیٹ والے دہشتگرد ہیں، منتخب نمائندے بھی خوف میں مبتلا ہیں۔
ذوالفقار علی بھٹو جونیئر نے سوال کیا کہ پاکستان آزاد ملک ہے یا نہیں، امریکی حکام نے اس واقعہ کے بعد شہداء اور زخمیوں پر مقدمہ درج کروایا ہے۔ انہوں نے کہا کہ ہر احتجاج میں پلانٹڈ لوگ ہوتے ہیں، اگر آپ کا کوئی لیڈر مرے گا تو پھر ہم کیوں نہ امریکی قونصل خانے پر جائیں، اپنے کزن بلاول بھٹو سے انصاف کا مطالبہ کرتا ہوں۔ انہوں نے کہا کہ میں کسی کو نہیں کہوں گا کہ آپ اپنی زندگی خطرے میں ڈالیں لیکن شہادت ہمارے لیے اعزاز ہے۔ انہوں نے کہا کہ پاکستان ہمارے وزیراعظم اور وزراء کی وجہ سے بدنام ہو رہا ہے، پاکستان میں انصاف ایک خیالی چیز ہے، پاکستان میں ظلم کرنے والوں کی کوئی کمی نہیں اور مظلوم بھی بہت ہیں قانونی طور شہدا کے لواحقین انصاف لینا چاہتے ہیں، ہم مظلوم خاندانوں کے ساتھ ہیں۔
انہوں نے کہا کہ پاکستان کو بورڈ آف پیس کا حصہ نہیں بننا چاہیے تھا، پاکستان ایک سامراجی منصوبہ کا حصہ بن گیا ہے، پاکستان کو بورڈ آف پیس سے دستبردار ہوکر ایران کے ساتھ کھڑا ہونا چاہیے۔ انہوں نے کہا کہ ایران ہمارے دل کے قریب اور پڑوسی ہے، ہمیں ایران کو مدد دینی چاہیے، ایران ایک خودمختار ملک ہے، ایران میں پانی بجلی سب موجود ہے، ایران کی پاکستان کو مدد کرنی چاہیے، لیکن ہم امریکہ کے غلام ہیں، ہم ان کی بات مانیں گے۔ انہوں نے کہا کہ سندھ پولیس ٹرگر ہیپی ہے، ان کے پاس ربڑ یا کوئی اور آلات نہیں ہیں، یہ سیدھا فائر کرتے ہیں۔ انہوں نے کہا کہ امریکہ اس طرح کی بدتمیزی کسی اور ملک میں تو نہیں کرے گا، امریکہ ہمیں انسان نہیں سمجھتا، ہمیں پتہ ہے کہ امریکی قونصلیٹ پر کس نے فائرنگ کی؟ یہ تو امریکن کو بھی پتہ ہے۔
The post دہشتگرد امریکی قونصلیٹ والے ہیں، ہمارے بچے نہیں، ذوالفقار بھٹو جونیئر appeared first on شیعہ نیوز پاکستان.
