شیعہ نیوز: حماس نے اس بات پر زور دیا ہے کہ قابض صیہونی فوج کی طرف سے رام اللہ شہر پر دھاوا بولنا، حقوقِ انسانی اور خواتین کے اداروں کو نشانہ بنانا اور نابلس میں دسیوں شہریوں کی گرفتاری صیہونی جرائم، سرکوبی اور فسطائیت میں بے پناہ اضافے کی کھلی عکاسی کرتا ہے۔ حماس نے واضح کیا کہ یہ تمام صیہونی جرائم فلسطینی عوام کے عزمِ استقلال اور ثبات کو ڈگمگانے میں مکمل طور پر ناکام رہیں گی۔
حماس رہنما محمود مرداوی نے ایک صحافتی بیان میں کہا کہ صیہونی فورسز کا رام اللہ شہر پر حملہ آور ہونا، حقوقِ انسانی اور خواتین کی تنظیموں کو نشانہ بنانا اور اس کے ساتھ ساتھ نابلس میں گرفتاریوں کی وسیع مہم چلانا قابض صیہونی حکومت کی اس وحشت اور ظالمانہ پالیسیوں کا تسلسل ہے جس کا مقصد فلسطینیوں کی مزاحمتی توانائیاں اور بقا کی بنیادیں ختم کرنا ہے۔
مرداوی نے وضاحت کی کہ رام اللہ میں انسانی حقوق کے اداروں پر صیہونی فورسز کا حملہ اور ’الضمير‘ فاؤنڈیشن کے ہیڈکوارٹر سے سامان اور دستاویزات کو لوٹنا اس بات کا ثبوت ہے کہ صیہونی حکومت ان فلسطینی اداروں کا قلع قمع کرنا چاہتی ہے جو حقوقِ انسانی اور امدادی میدان میں فعال ہیں اور جو صیہونی مظالم کو ریکارڈ کرنے اور اسیران اور عام شہریوں کے حقوق کا دفاع کرنے کی جدوجہد کر رہے ہیں۔
یہ بھی پڑھیں : غزہ کی پٹی پر صیہونی بمباری اور فائرنگ کے مسلسل حملے، خاتون شہید، متعدد شہری شدید زخمی
انہوں نے اس بات کی طرف توجہ دلائی کہ ان اداروں کو نشانہ بنانا صیہونی ریاست کے سفاکانہ جرائم کی حقیقت کو دنیا کی نظروں سے اوجھل نہیں کر سکتا اور نہ ہی فلسطینی عوام کے مصائب کو بے نقاب کرنے والی آوازوں کو خاموش کر سکتا ہے، بلکہ اس سے فلسطینی عوام، ان کی تنظیمیں اور تمام قومی طاقتیں اپنی ارضِ پاک اور حق کے دفاع میں اور زیادہ مضبوطی سے ڈٹ جائیں گی۔
حماس کے رہنما نے زور دے کر کہا کہ یہ باہم مربوط صیہونی حملے—جن میں شہروں پر چھاپے، اداروں کو تباہ کرنا اور گرفتاریاں شامل ہیں—فلسطینی قوم کو اپنی مقدس زمین اور مقدسات کا دفاع جاری رکھنے سے ہرگز پیچھے نہیں ہٹا سکتے۔
مرداوی نے بین الاقوامی برادری، دنیا کے تمام آزاد انسانوں اور حقوقِ انسانی کے عالمی اداروں سے اپیل کی کہ وہ صیہونی مظالم اور بڑھتے ہوئے جرائم پر اپنی اخلاقی و قانونی ذمہ داریاں پوری کریں اور ان بربرانہ اقدامات کو روکنے اور صیہونی رہنماؤں کو کیفِرِ کردار تک پہنچانے کے لیے فوری تحرک اختیار کریں۔
واضح رہے کہ اکتوبر سنہ 2023ء میں غزہ کی پٹی پر صیہونی نسل کشی اور تباہ کن جنگ کے آغاز کے بعد سے مقبوضہ مغربی کنارے میں فلسطینی شہریوں اور ان کی املاک پر صیہونی فوج اور مسلح آباد کاروں کے دہشت گردانہ حملوں میں بے پناہ اضافہ ہوا ہے۔
یہ صیہونی تجاوزات متعدد ہولناک شکلوں میں سامنے آ رہی ہیں، جن میں فلسطینی شہریوں کا سفاکانہ قتل، گرفتاریوں کا طوفان، گھروں اور تنصیبات کی مسماری، مساجد اور گاڑیوں کو آگ لگانا، زرعی اراضی کو بلڈوز کرنا، کسانوں کو ان کے کھیتوں سے روکنا، جبری نقل مکانی اور غیر قانونی استیطانی توسیع شامل ہیں۔
The post رام اللہ پر صیہونی دھاوا ، نابلس میں گرفتاریاں، مظلوم فلسطینی عوام کی ثابت قدمی کو متزلزل نہیں کر سکتی، حماس appeared first on شیعہ نیوز پاکستان.
