شیعہ نیوز: مقبوضہ مغربی کنارے میں رمضان المبارک کے پہلے روز ہی اسرائیلی فوج کی جارحیت اور انتہا پسند آبادکاروں کے حملوں کا سلسلہ جاری رہا۔ گذشتہ رات اور آج بدھ کی علی الصبح اسرائیلی فوج نے مختلف علاقوں میں چھاپہ مار کارروائیاں کیں اور متعدد فلسطینیوں کو گرفتار کر لیا۔
رام اللہ کے شمال مشرق میں واقع گاؤں یبرود میں مسلح آبادکاروں نے دھاوا بولا اور اندھا دھند فائرنگ کی، جس کے دوران شرپسند آبادکار فلسطینیوں کی بھیڑ بکریاں بھی چرا کر لے گئے۔ اس حملے کے بعد پیدا ہونے والی شدید جھڑپوں کے دوران اسرائیلی فوج نے گاؤں پر دھاوا بول دیا، ان حملوں اور تصادم کے نتیجے میں دو فلسطینی زخمی ہوئے۔
اسرائیلی فوج نے رام اللہ کے شمال مشرق میں ہی واقع گاؤں عین یبرود پر یلغار کے دوران نہتے شہریوں کے گھروں پر آنسو گیس کے گولے داغے۔
یہ بھی پڑھیں : عرب اور اسلامی ممالک کی صیہونی حکومت کے غیرقانونی اقدامات کی مذمت
دوسری جانب رام اللہ کے شمال مشرقی قصبے ترمسعیا کے میدانی علاقے القرنہ میں آبادکار ملیشیا کے حملے کے بعد شدید جھڑپیں ہوئیں، جس پر اسرائیلی فوج نے علاقے کی فضاؤں میں روشنیاں بکھیرنے والے پیرا شوٹ بم (فلیرز) فائر کیے۔
اسرائیلی فوج کی یہ وحشیانہ کارروائیاں رام اللہ کے مشرقی قصبے دیر دبوان تک پھیل گئیں، جبکہ مقبوضہ بیت المقدس کے شمال میں واقع قلندیا چوکی کے قریب قابض فوج کی گولی لگنے سے ایک فلسطینی نوجوان زخمی ہو گیا۔
الخلیل میں بھی صورتحال کشیدہ رہی جہاں قابض فوج نے شہر کے شمال میں واقع قصبے بیت امر پر دھاوا بولا اور ایک گھر کی تلاشی لی، اس کے علاوہ شہر کے مغرب میں واقع قصبے اذنا میں بھی متعدد گھروں کی حرمت پامال کی گئی۔
اسرائیلی فوج نے خلیل کے شمالی قصبے بیت امر سے نوجوان محمد بسام العلامی کو گرفتار کر لیا، جبکہ شہر کے جنوبی علاقے میں واقع گھر پر چھاپے کے دوران نوجوان انور حمدی الدیک کو بھی حراست میں لے لیا گیا۔
نابلس کے جنوب مغرب میں واقع گاؤں تل میں بھی اسرائیلی فوج نے ناصر عرایشی کے گھر پر چھاپہ مار کر انہیں گرفتار کر لیا، جبکہ قصبہ قصرہ میں اسرائیلی فوج نے بڑے پیمانے پر تلاشی کی کارروائیوں اور گرفتاریوں کا سلسلہ جاری رکھا ہوا ہے۔
The post رمضان کے پہلے روز مغربی کنارے میں اسرائیلی فوج اور آبادکاروں کھلے عام دہشت گردی appeared first on شیعہ نیوز پاکستان.
