شیعہ نیوز: مجلس وحدت مسلمین کے مرکزی رہنماء علامہ مقصود علی ڈومکی نے کہا ہے کہ دنیا بھر کے کروڑوں انسان رہبرِ شہید حضرت آیت اللہ سید علی خامنہ ای کے غم میں سوگوار ہیں۔ ایران میں، دو کروڑ عوام نے تشییع جنازہ میں شرکت کرکے دشمن کے تمام تر منصوبوں کو خاک میں ملا دیا۔ انہوں نے کہا کہ وفاقی حکومت کے غیر ذمہ دارانہ رویے کے باعث اس سال بھی لاکھوں پاکستانی زائرین زیارت کربلائے معلیٰ سے محروم رہیں گے۔ یہ بات انہوں نے سید کامران علی شاہ بخاری کی جانب سے انجمن پیر بخاری کے زیر اہتمام منعقدہ مجلسِ عزاء سے خطاب کرتے ہوئے کہی۔
علامہ مقصود ڈومکی نے کہا کہ آج دنیا بھر کے کروڑوں انسان رہبرِ شہید حضرت آیت اللہ سید علی خامنہ ای کے غم میں سوگوار ہیں۔ ایران میں کروڑوں عوام نے تشییعِ جنازہ میں شرکت کرکے دشمن کے تمام تر منصوبوں کو خاک میں ملا دیا۔ ایرانی عوام اور امت مسلمہ کے دلوں میں رہبرِ شہید کی بے مثال محبت، عقیدت اور وفاداری نے ایک طرف امریکہ اور اسرائیل کو شدید پریشانی میں مبتلا کر دیا ہے، جبکہ دوسری جانب ان کے ایجنٹوں اور تکفیری ٹولے کی بے چینی بھی نمایاں ہو چکی ہے۔ انہوں نے کہا کہ امریکہ نے رہبرِ شہید کو قتل کرکے اپنی ذلت، رسوائی اور شکست کا سامان خود کیا ہے۔ ہر گزرتے دن کے ساتھ حق، مقاومت اور اہلِ حق کی کامیابیاں مزید نمایاں ہو رہی ہیں، جبکہ باطل کی ناکامی دنیا پر آشکار ہو رہی ہے۔
علامہ مقصود علی ڈومکی نے زائرین کے بائے روڈ سفر پر پابندی کی مذمت کرتے ہوئے کہا کہ وفاقی حکومت کے غیر ذمہ دارانہ رویے کے باعث اس سال بھی لاکھوں پاکستانی زائرین زیارتِ کربلائے معلیٰ سے محروم رہیں گے، کیونکہ غریب اور متوسط طبقے کے افراد فضائی سفر کے بھاری اخراجات برداشت نہیں کر سکتے۔ انہوں نے مطالبہ کیا کہ زمینی راستے سے زائرین کی آمد و رفت فوری طور پر بحال کی جائے۔ انہوں نے کہا کہ پاکستان کے ہر شہری کا بنیادی آئینی حق ہے کہ وہ جب چاہے ملک کے کسی بھی حصے میں آزادانہ سفر کرے۔ اپنے ہی ملک کے شہریوں کو زمینی راستے سے سفر سے روکنا آئینِ پاکستان اور بنیادی شہری حقوق کی خلاف ورزی ہے۔ حکومت فوری طور پر اس پابندی کو ختم کرے اور زائرین کو سہولت، تحفظ اور عزت کے ساتھ سفر کی ضمانت فراہم کرے۔
The post زائرین ایران و عراق کیلئے زمینی راستے فی الفور کھولے جائیں، علامہ مقصود ڈومکی appeared first on شیعہ نیوز پاکستان.
