شیعہ نیوز: یمن کی تحریک انصار اللہ کے رہبر نے زور دے کر کہا ہے کہ سعودی عرب، امریکہ اور اسرائیل کے ساتھ مل کر جان بوجھ کر یمنی قوم کے خلاف جرائم کا ارتکاب کر رہا ہے۔
رپورٹ کے مطابق یمن کی تحریک انصاراللہ کے رہبر سید عبدالملک بدرالدین الحوثی نے 2016 میں صنعا کے علاقے الصالۃ الکبریٰ میں سعودی-امریکی اتحاد کے جرم کی دسویں برسی کے موقع پر ایک خطاب میں کہا کہ سعودی حکومت خود کو حرمین شریفین کا خادم کہتی ہے لیکن اس کے پرچم پر بنی ہوئی تلوار، صرف امت مسلمہ کے خلاف نیام سے باہر آتی ہے۔
یہ بھی پڑھیں : کسی بھی باہری طاقت کو آبنائے ہرمز اور خلیج فارس میں دھمکی اور مداخلت حق نہیں
المیادین ٹی وی کے حوالے سے ارنا کی رپورٹ کے مطابق انھوں نے کہا کہ الصالۃ الکبریٰ کا وہ جرم جو سعودی حکومت نے صنعا میں انجام دیا، تقریباً ایک ہزار افراد کے شہید اور زخمی ہونے کا سبب بنا تھا، یمن کے تمام صوبے سعودی حکومت کے انسانیت سوز اور جنگی جرائم کے شاہد ہیں، سعودی عرب، امریکہ اور صیہونی حکومت کے ساتھ مل کر دانستہ طور پر یمنی عوام کے خلاف جرائم کر رہا ہے، سعودی حکومت بے گناہوں کا خون بہانے کی عادی ہے اور تمام مسلم اقوام کو اس حکومت کو ایک مجرم کی حیثیت سے دیکھنا چاہیے۔
الحوثی نے مزید کہا کہ سعودی حکومت، یمنی قوم کی مزاحمت کی قوت کو توڑنے اور اسے جھکنے پر مجبور کرنے کی کوشش کر رہی ہے لیکن وہ وہم میں مبتلا ہے کیونکہ بارہ سالہ جارحیت سے واضح ہوتا ہے کہ جب بھی سعودی دشمن یمنی قوم کا زیادہ خون بہاتا ہے، یمنی غیور عوام جارحیت کا مقابلہ کرنے کے لیے مزید پرعزم ہو جاتے ہیں۔ انھوں نے کہا کہ جو بھی سعودی عرب کے ساتھ کھڑا ہے، وہ بھی اس گناہ اور جارحیت میں شریک ہے۔
سید عبدالملک الحوثی نے زور دے کر کہا کہ ہمارے دشمن غصے میں ہیں کیونکہ یمن نے اپنی سرزمین پر اپنی حاکمیت نافذ کر دی ہے، بین الاقوامی بحری آمد و رفت کو جو چیز خطرے میں ڈال رہی ہے، وہ سعودی عرب کی جانب سے باب المندب کے علاقے کو جنگی علاقہ بنانا ہے۔ انھوں نے کہا کہ ہمارا موقف مضبوط ہے اور ہم سعودی افواج پر شدید ترین ضربیں لگاتے رہیں گے، سعودی عرب جتنی زیادہ جارحیت کرے گا اور محاصرے پر بضد رہے گا، اتنا ہی زیادہ نقصان اٹھائے گا۔ انھوں نے کہا کہ سعودی عرب کو تیل کی برآمدات میں نقصان ہوگا اور اس کی تیل تنصیبات اور فوجی اڈوں کو نشانہ بنایا جائے گا۔
رہبر انصاراللہ نے مزید کہا کہ میں ایک بار پھر یمن کے لوگوں سے اپیل کرتا ہوں کہ وہ کل جمعہ کو صنعا اور تمام صوبوں میں ہونے والے ملین مارچ میں شرکت کریں اور جارحیت اور محاصرے کا مقابلہ کرنے اور سعودی جرائم کی مذمت کے اپنے ٹھوس موقف پر زور دیں۔
انھوں نے کہا کہ صیہونی دشمن کی جانب سے کشیدگی بڑھانے کے ہر مرحلے کا مقابلہ کرنے کے لیے ہم تیار ہیں اور ہم اللہ کی مدد سے تمام آپشنز اور موقف کی اعلیٰ ترین سطح پر فلسطینی قوم کی حمایت کریں گے۔
The post سعودی عرب، امریکہ اور اسرائیل کے ساتھ مل کر یمنی قوم کے خلاف جرائم کر رہا ہے، الحوثی appeared first on شیعہ نیوز پاکستان.
