شیعہ نیوز: انٹرنیشنل نیوز رپورٹ کے مطابق، دمشق اور شامی کردوں (جنہیں شامی جمہوری فورسز (قسد) کہا جاتا ہے) کے نمائندوں کے درمیان کل رات ہونے والے معاہدے اور شامی جمہوری فورسز کی حراستی مراکز سے ہزاروں داعش قیدیوں کے فرار کے بعد، عراقی حشد شعبی نے اپنی فورسز کو شام اور عراق کی سرحدی پٹی میں بھیج کر اس علاقے کی سیکیورٹی کی ذمہ داری سنبھال لی ہے۔
واضح رہے قسد کی حراستی مراکز سے درجنوں داعش کارندوں کے فرار کے باعث، عراقی حکومت نے آج صبح سے احتیاطی اقدامات اپناتے ہوئے ممکنہ طور پر ان دہشت گرد عناصر کے ملک میں داخلے کو روک دیا ہے۔
اسی سلسلے میں، نینوا صوبے میں حشد شعبی کمانڈ نے اپنی جنگی یونٹس کو صوبے کے سرحدی علاقوں میں مشرقی شام کے ساتھ تعینات کر کے داعش عناصر کی عراقی سرزمین میں داخلے یا ان کی جانب سے دہشت گردانہ کارروائیوں کی کسی بھی کوشش کو ناکام بنانے کے لئے کمر کس لی ہے۔
اطلاعات کے مطابق حشد شعبی کی کچھ فورسز اس صوبے کے سرحدی علاقوں میں واچ ٹاورز پر تعینات ہو گئی ہیں۔ حشد شعبی کی کچھ ریپڈ رسپانس فورسز بھی عراق اور شام کی سرحدی پٹی میں تعینات کر دی گئی ہیں۔
واضح رہے کچھ دن قبل جولانی حکومت کی افواج اور شامی کردوں کے درمیان شدید جھڑپوں کے ساتھ ہی، مقامی میڈیا نے شام کے الحساکہ علاقے میں واقع “الشددادی” جیل سے داعشی دہشت گردوں کے فرار کے لمحات کی ویڈیوز بھی سامنے آئی ہے ۔
یہ جیل امریکہ کی حمایت یافتہ کرد افواج کے کنٹرول میں تھی جو الحساکہ علاقے سے جولانی افواج کے حملے کے باعث پیچھے ہٹ گئیں۔
شامی کرد اور جولانی حکومت ایک دوسرے پر الزام لگا رہے ہیں کہ انہوں نے جان بوجھ کر ان داعشی دہشت گردوں کو فرار کرایا ہے جو برسوں سے اس جیل میں قید تھے۔
The post شام میں “الشددادی” جیل سے ہزاروں داعشی دہشت گردوں کو شامی حکومت نے فرار کروادیا ، عراق شام سرحد پر حشد شعبی فورسز تعینات appeared first on شیعہ نیوز پاکستان.
