شہیدِ خامس رہبرِ معظم سید علی خامنہ ایؒ کی سیرت النّبیؐ پر ایک کتاب

کیا کبھی آپ نے سوچا ہے کہ ہم میں سے خوش قسمت کون ہے؟ اربابِ علم و دانش کے نزدیک خوش قسمت وہ انسان ہے جو اچھی کتابوں کا دوست ہو، اور یا پھر اچھی کتابوں کا مطالعہ کرنے والے لوگ اُس کے دوست ہوں۔ آج ہم آپ کی ایک کتاب سے دوستی کرانا چاہتے ہیں۔ یہ کتاب سیرت النّبیؐ کے بارے میں ہے اور بلاشبہ سیرتِ نبویؐ پر بے شمار کتب موجود ہیں۔ اس کتاب کا نام “پیغمبرِ رحمت ﷺ” ہے۔  آپ یقیناً یہ جان کر خوش ہو جائیں گے کہ یہ کتاب شہیدِ خامس رہبرِ معظم سید علی خامنہ ایؒ کے خطابات و بیانات پر مبنی ہے۔ یہ ایک ایسی منفرد تصنیف ہے جو تاریخی واقعات کو روحانی اور تہذیبی اقدار کے ساتھ بیان کرتی ہے۔

حجۃ الاسلام مولانا  حسنین عباس گردیزی صاحب نے اس کتاب کا فارسی سے اردو میں نہایت سلیس اور رواں ترجمہ کیا ہے۔ اس کتاب کے ابتدائی اوراق ہی قاری کو عقیدت اور بصیرت کی دنیا میں لے جاتے ہیں۔ ایک ایسی دنیا میں کہ جہاں سیرتِ طیبہؐ کے مختلف پہلو نہایت منظم انداز میں مرتّب کئے گئے ہیں۔ نسبِ رسول ﷺ، ولادتِ باسعادت اور خانوادۂ نبوی کا بیان دل میں محبت کی بنیاد رکھتا ہے، جبکہ بعثت کے دور، جزیرۃ العرب کے حالات اور سابقہ ادیان میں بشارات کا تذکرہ اس حقیقت کو واضح کرتا ہے کہ سچائی اپنے آثار سے پہچانی جاتی ہے، اور رسول ﷺ کی نبوّت اس کائنات کی ایک ناقابلِ تردید حقیقت ہے۔

مکی اور مدنی زندگی کے ابواب قاری کو یہ سکھاتے ہیں کہ  وہ کبھی بھی ظاہری کمزوری، قلت اور مخالفت سے نہ گھبرائے۔ سیرت النبیؐ کا مطالعہ انسان کو  کمزوری میں قوت، قلت میں کثرت اور مخالفت میں کامیابی کے بہترین نسخے عطا کرتا ہے۔ حقیقی انسانیّت یہ ہے کہ انسان  اندھیروں میں بھی روشنی کا راستہ دکھائے، اور  ایسا انسان فقط سیرت النّبیؐ  کے سائے میں پروان چڑھ سکتا ہے۔

ہماری دانست میں جو شخص بھی ختمِ نبوّت پر ایمان رکھتا ہے وہ اس کتاب کا مطالعہ ضرور کرے۔ اس کتاب میں ختمِ نبوت کا وہ عمیق فہم ہے جو شہید خامس سید علی خامنہ ای امّت کو عطا کرنا چاہتے ہیں۔ آپ ختمِ نبوت کے عقیدے کو ایک زندہ شعور، ایک مکمل نظامِ حیات اور ایک قُطب نُما کے طور پر دیکھتے ہیں۔ نبیِ خاتمؐ کے بارے میں آپؒ کے افکار و نظریات کا مطالعہ انسان کو اس امر کیلئے آمادہ کرتا ہے کہ وہ ختمِ نبوّت کے عقیدے کو اچھی طرح سمجھ کر اُس کے قالب میں اپنی زندگی کو ڈھالے۔ آخری نبیؐ کی پیروی کا مفہوم ہی یہی ہے کہ انسان آخری نبیؐ کی سیرت کے مطابق زندگی بسر کرے۔

اگر کوئی چاہے کہ وہ صاحبِ فکر و نظر، حاملِ علم و بصیرت سید علی خامنہ ای کی معنوی گہرائی اور علمی رفعت کا ایک قطرہ چکھے، اُن کی معنویت کو ایک لمحہ دیکھے، اُن کی روحانیّت کی ایک جھلک پائے تو اسے اس کتاب کا مطالعہ ضرور کرنا چاہیئے۔ اُن کی جدائی کے بعد اُن کی یہ کتاب ہماری  فکر کو سنوارنے، زندگی کو نکھارنے اور دل کو ایک قرار و سکون بخشنے کا وسیلہ ہے۔

سیرت و اخلاق کے ابواب میں نبی اکرم ﷺ کی ذاتی و اجتماعی زندگی کا ایسا جامع نقشہ پیش کیا گیا ہے کہ جو جہاں حال کی رہنمائی کرتا ہے وہیں ایک روشن مستقبل کی امید اور آرزو  بھی پیدا کرتا ہے۔ اس کتاب میں اسلامی تہذیب، امت سازی اور قیادت کے اصول اس انداز میں بیان ہوئے ہیں کہ قاری خود کو ایک باوقار مسلمان اور ذمہ دار انسان کے طور پر محسوس کرنے لگتا ہے۔ آخری باب میں دشمنانِ اسلام کے رویّوں کا تجزیہ قاری میں فکری بیداری پیدا کرتا ہے اور اُسے یہ احساس دلاتا ہے کہ حق و باطل کی کشمکش ازل سے ہے اور ابد تک رہے گی۔ یہ کشمکش خود دلیل ہے کہ سرورِ دو عالمؐ کے دشمن، حاسد اور معاند  اپنی تمام تر کوششوں اور کاوشوں کے ساتھ اسلامِ حقیقی کو نہ ماضی میں مسخ کر سکے ہیں اور نہ ہی آئندہ کر پائیں گے۔ اسی میں شامل وہ خط بھی ہے جو سید علی خامنہ ای نے  مغرب کے نوجوانوں کے نام لکھا، جو آج بھی اہلِ مغرب کیلئے  ایک زندہ دعوتِ فکر ہے۔

المختصر یہ کہ ’’پیغمبرِ رحمت ﷺ‘‘ نامی یہ کتاب ہمیں نبیؐ کی سیرت کو اپنی زندگی میں نافذ کرنے کا سلیقہ سکھاتی ہے۔ یہ زندگی کو جہاد اور انسان کو مجاہد بنانے کی بنیادیں فراہم کرتی ہے۔ یہ جہاں دل کو عشقِ رسول ﷺ سے لبریز کرتی ہے، وہیں درست معلومات کا خزانہ بھی ہے۔ جو شخص بھی سیرتِ نبویؐ کو سمجھنا، محسوس کرنا اور اپنی زندگی کا حصہ بنانا چاہتا ہے، اس کے لیے اس کتاب کا مطالعہ ناگزیر ہے۔ محدود تعداد میں یہ کتاب جامعۃ الرضا اسلام آباد کے بُک اسٹال پر   دستیاب ہے۔ آپ اس نمبر 03455398135 پر اُنہیں فون کرکے بذریعہ ڈاک بھی منگوا سکتے ہیں۔