شیعہ نیوز: مجلس وحدت مسلمین پاکستان کے سربراہ سینیٹر علامہ راجہ ناصر عباس جعفری نے کہا کہ اسلام آباد کے علاقے ترلائی میں مسجد خدیجہ الکبریٰ میں ہونے والے افسوسناک دھماکے اور بے گناہ نمازیوں کی شہادت پر میں دلی طور پر نہایت غمزدہ اور رنجیدہ ہوں۔
انہوں نے کہا کہ وفاقی دارالحکومت میں اس نوعیت کی دہشت گردانہ کارروائی نہ صرف انسانی جانوں کے تحفظ میں سنگین ناکامی کا ثبوت ہے بلکہ یہ انتظامیہ اور قانون نافذ کرنے والے اداروں کی کارکردگی پر بھی ایک بڑا سوالیہ نشان ہے۔
یہ بھی پڑھیں : چین نے ایران کے ایٹمی حقوق کا واضح طور پر دفاع کیا، کاظم غریب آبادی
سینیٹر علامہ راجہ ناصر عباس جعفری نے کہا کہ میں اس وحشیانہ اور بزدلانہ حملے کی شدید ترین الفاظ میں مذمت کرتا ہوں اور شہداء کے اہلِ خانہ سے دلی تعزیت و ہمدردی کا اظہار کرتا ہوں، جبکہ زخمیوں کی جلد صحت یابی کے لیے دعا گو ہوں۔ عبادت گاہوں کو نشانہ بنانا انسانیت، دین اور معاشرتی اقدار پر براہِ راست حملہ ہے جسے کسی صورت برداشت نہیں کیا جا سکتا۔
انہوں نے کہا کہ میں اسلام آباد کے باشعور اور باہمت نوجوانوں سے پرزور اپیل کرتا ہوں کہ اس نازک گھڑی میں انسانیت کا ثبوت دیتے ہوئے آگے بڑھیں۔ اس وقت اسلام آباد کے مختلف ہسپتالوں میں زخمی نمازیوں کے لیے خون کی شدید ضرورت ہے، لہٰذا آپ سب اس کارِ خیر میں بڑھ چڑھ کر حصہ لیں اور قیمتی جانیں بچانے میں اپنا کردار ادا کریں۔
The post شیعہ جامع مسجد میں دھماکہ، انتظامیہ اور قانون نافذ کرنے والے اداروں کی کارکردگی پر ایک بڑا سوالیہ نشان ہے، سینیٹر علامہ راجہ ناصر عباس appeared first on شیعہ نیوز پاکستان.
