شیعہ نیوز: ملک بھر کے علما ء مشائخ کی نمائندہ تنظیم علماء مشائخ فیڈریشن آف پاکستان کی اپیل پر جمعہ کے روز ملک بھر میں ایران پر امریکی و اسرائیلی حملے، اسلامی جمہوری ایران کے رہبر آیت اللہ خامنہ ای کی شہادت پر احتجاج کیلئے یوم یکجہتی ایران منایا گیا۔ نماز جمعہ کے خطبات میں آئمہ کرام،علماء و مشائخ نے ایرانی قوم اور حکومت سے اظہار یکجہتی کرتے ہوئے ایران کے خلاف امریکہ اور اسرائیل کی کارروائیوں کو کھلی جارحیت قرار دیتے ہوئے شدید مذمت کی ہے۔ انہوں نے ایران پر امریکی و اسرائیلی حملے ایرانی حکومت اور عوام سے یکجہتی کا اظہار اور ایرانی قیادت کی شہادتوں پر تعزیت کرتے ہوئے کہا کہ ایرانی سپریم لیڈر آیت اللہ خامنہ ای، اعلیٰ قیادت اور بے گناہ شہریوں کی ہلاکت انتہائی دلخراش سانحہ ہے، یہ حملہ صرف ایک ملک پر نہیں بلکہ پورے خطے کے امن اور استحکام پر حملہ ہے۔
انہوں نے کہا کہ برسوں سے اسرائیل مسلم دنیا کے خلاف سخت رویہ اپنائے ہوئے ہے لیکن عالمی طاقتیں اور بین الاقوامی ادارے اسے روکنے میں سنجیدہ کردار ادا کرنے میں ناکام رہے ہیں جو لمحہ فکریہ ہے۔ مختلف شہروں میں جمعہ کے اجتماعات سے خطاب کرتے ہوئے علماء مشائخ نے امریکہ اور اسرائیل کی جانب سے ایران پر حالی حملوں اس کا نتیجے میں ہونے والی تباہی اور جانی نقصان کی شدید الفاظ نے مذمت کرتے ہوئے کہا کہ یہ کاروائیاں خطے کے امن کے لیے سنگین خطرہ ہیں طاقت کے نشے میں دھت قوت مشرق وسطی میں مسلسل جنگ و جدل کو ہوا دے رہی ہیں، جس کے باعث بے گناہ انسانوں کی جانیں ضائع ہورہی ہیں، پورا خطہ عدم استحکام کا شکار ہو رہا ہے، عالمی برادری کو چاہیئے کہ فوری طور پر جارحیت کا نوٹس لیں اور خطے میں امن کے قیام کے لیے اپنا کردار ادا کرے۔
ان کا کہنا تھا کہ حکومت پاکستان بورڈ آف پیس سے پاکستان علیحدگی کا اعلان کرے، امریکن بورڈ آف پیس میں رہنے کا کوئی جواز باقی نہیں رہا کیونکہ امریکا خود جنگوں کو ہوا دے رہا ہے، پاکستان کو ایک خودمختار اور جرات مندانہ خارجہ پالیسی اپنانی چاہیے جو قومی مفادات اور امت مسلمہ کے اتحاد کے مطابق ہو۔ انہوں نے مزید کہا کہ بیرونی خطرات کے ساتھ ساتھ اندرونی مسائل بھی شدت اختیار کر چکے ہیں، خطبات میں آئمہ کرام، علماء و مشائخ نے پاکستان اور افغانستان کے درمیان بڑھتی ہوئی کشیدگی پر بھی گہری تشویش کا اظہار کیا اور جنگ جیسی صورتحال’ کو افسوسناک قرار دیا۔ انہوں نے افغانستان کی طالبان قیادت پر مبینہ طور پر دہشت گرد گروہوں کو ختم کرنے کے بجائے ان کی ”سرپرستی” کرنے پر تنقید کی اور افغان حکومت پر زور دیا کہ وہ ”بھارت کے لیے پراکسی وار” کے بجائے مذاکرات کا راستہ اپنائے۔
The post علماء مشائخ فیڈریشن کا رہبر معظم سید علی خامنہ ای کی شہادت پر یوم یکجہتی ایران appeared first on شیعہ نیوز پاکستان.
