شیعہ نیوز : اسلام آباد میں منعقد ہونے والی علماء و مشائخ کانفرنس نہ صرف مذہبی ہم آہنگی کے حوالے سے ایک اہم قدم ثابت ہوئی بلکہ ریاست کی حالیہ پالیسی کے نمایاں رخ کو بھی سامنے لے آئی۔
کانفرنس میں ملک بھر سے معتدل اور جمہوری فکر رکھنے والے جید علمائے کرام نے شرکت کی، تاہم سب سے قابلِ ذکر بات یہ رہی کہ تکفیری اور دہشت گردی سے منسلک عناصر کو اس ایونٹ سے مکمل طور پر الگ رکھا گیا۔
ذرائع کے مطابق ریاستی اداروں نے واضح انداز میں یہ مؤقف اختیار کیا ہے کہ ایسے گروہوں کو قومی سطح کے فورمز پر جگہ نہیں دی جائے گی جو ماضی میں تحریک طالبان پاکستان کے فکری یا نظریاتی ہم نوا سمجھے جاتے رہے ہیں۔
کانفرنس سے ان عناصر کا اخراج اس بات کا ثبوت ہے کہ ریاست دہشت گردی کے بیانیے سے وابستہ کسی بھی گروہ کو قومی دھارے میں دوبارہ داخل ہونے کی اجازت دینے کے موڈ میں نہیں۔
کانفرنس میں شریک علمائے کرام نے زور دیا کہ پاکستان کو درپیش سب سے بڑا چیلنج داخلی انتہاپسندی ہے، اور اس سے نمٹنے کے لیے متحد اور واضح بیانیہ وقت کی اہم ضرورت ہے۔
یہ بھی پڑھیں : لاطینی امریکہ پر مغربی دباؤ کا مقصد توانائی کے ذخائر پر قبضہ جمانا ہے، آیت اللہ خامنہ ای
مقررین نے اس بات پر بھی اتفاق کیا کہ طالبان کی جانب سے ریاستی رٹ کو چیلنج کرنا اور بے گناہ شہریوں کو نشانہ بنانا کسی بھی طرح مذہبی تعلیمات سے مطابقت نہیں رکھتا۔
اس اہم اجتماع کا بنیادی مقصد طالبان اور ان کے فکری سرپرست گروہوں کے خلاف ایک مشترکہ، مضبوط اور منطقی بیانیہ تیار کرنا تھا، تاکہ ملک بھر کے مدارس، منبروں اور مذہبی اجتماعات میں دہشت گردی کی گمراہ کن تعبیرات کا مؤثر جواب دیا جا سکے۔
ریاستی نمائندوں نے بھی اس مسئلے پر بھرپور حمایت کا اظہار کرتے ہوئے کہا کہ اب وقت آگیا ہے کہ مذہبی انتہاپسندی کے ہر چہرے کو بے نقاب کیا جائے۔
کانفرنس کے اختتام پر یہ واضح پیغام سامنے آیا کہ پاکستان میں اب صرف وہی مذہبی آواز قابلِ قبول ہوگی جو امن، رواداری اور ریاستی قانون کی بالادستی کو تسلیم کرتی ہے،جبکہ تکفیری اور دہشت گرد سوچ رکھنے والے عناصر کے لیے قومی فورمز پر کوئی جگہ باقی نہیں رہی۔
The post علماء و مشائخ کانفرنس؛ ریاست کا مضبوط پیغام، تکفیری گروہوں سے واضح لاتعلقی appeared first on شیعہ نیوز پاکستان.
