شیعہ نیوز : فلسطینی وزارت صحت نے غزہ کی پٹی پر جاری قابض اسرائیلی مسلسل جارحیت کے نتیجے میں شہدا اور زخمیوں کی تعداد میں اضافے کا اعلان کیا ہے۔ وزارت نے تصدیق کی ہے کہ گذشتہ 48 گھنٹوں کے دوران غزہ کی پٹی کے ہسپتالوں میں 9 شہدا کے جسد خاکی اور 19 زخمیوں کو لایا گیا ہے، جبکہ ملبے تلے اور سڑکوں پر موجود متعدد متاثرین تک رسائی اب بھی ناممکن بنی ہوئی ہے۔
رپورٹ کے مطابق وزارت صحت نے اپنی روزانہ کی رپورٹ میں واضح کیا ہے کہ ایمبولینس عملہ اور شہر ی دفاع کی ٹیمیں وسیع پیمانے پر ہونے والی تباہی اور مسلسل میدانی خطرات کے باعث کئی لاشوں کو نکالنے سے قاصر ہیں، جس کی وجہ سے تلاش اور بچاؤ کی کارروائیاں آگے بڑھنے پر اصل تعداد میں اضافے کا قوی امکان ہے۔
یہ بھی پڑھیں : ایران پر امریکہ و اسرائیل کے حملے میں شامل نہیں، برطانیہ
اعداد و شمار کے مطابق جنگ بندی کے اعلان کے بعد سے اب تک شہدا کی کل تعداد 628 ہو چکی ہے جبکہ 1,686 زخمی ریکارڈ کیے گئے ہیں۔ اس کے علاوہ 735 افراد کو ملبے سے نکالا گیا ہے، جو اس بات کی عکاسی کرتا ہے کہ نام نہاد سیز فائر کے اعلان کے باوجود انسانی المیہ اور اس کے اثرات بدستور جاری ہیں۔
وزارت نے اس بات پر زور دیا ہے کہ سات اکتوبر سنہ 2023ء سے شروع ہونے والی اس بدترین جارحیت کے آغاز سے اب تک شہدا کی مجموعی تعداد 72,095 ہو گئی ہے اور زخمیوں کی تعداد 171,784 تک پہنچ چکی ہے۔ یہ غزہ کی پٹی کی تاریخ کے خونی ترین معرکوں میں سے ایک ہے، جس کے دوران غاصب دشمن کے دانستہ حملوں اور وسائل کی شدید قلت کے باعث صحت کے نظام کے مکمل طور پر بیٹھ جانے کے شدید خطرات منڈلا رہے ہیں۔
The post غزہ میں 48 گھنٹوں کے دوران 9 فلسطینی شہید ، 19 زخمی: وزارت صحت appeared first on شیعہ نیوز پاکستان.
