شیعہ نیوز: مجلس وحدت مسلمین پاکستان کے مرکزی سیکرٹری نشر و اشاعت و صوبائی آرگنائزر ایم ڈبلیوایم سندھ علامہ مقصود علی ڈومکی نے کہا ہے کہ ضلع لاڑکانہ کے علاقے باقرانی میں ایک بیوہ خاتون اور اس کی جوان بیٹی کے بہیمانہ قتل کی اطلاعات انتہائی افسوسناک، دل دہلا دینے والی اور قابل شدید مذمت ہیں۔ ابتدائی اطلاعات کے مطابق ان مظلوم خواتین کو تشدد کا نشانہ بنا کر قتل کیا گیا اور بعد ازاں لاشوں کو نہر میں پھینک دیا گیا، جو انسانیت، شریعت اور قانون، تینوں کی کھلی خلاف ورزی ہے۔ ایسا ہی ایک واقعہ ٹنڈو مستی میں پیش آیا جہاں ایک لڑکی کو قتلِ کر کے لاش بغیر غسل و کفن گڑھے میں پھینک دی گئی۔
انہوں نے کہا کہ یہ امر مزید تشویشناک ہے کہ اس واقعے کو مبینہ طور پر غیرت یا گھریلو تنازع کا رنگ دے کر اصل حقائق چھپانے کی کوشش کی جا رہی ہے، جبکہ بااثر عناصر کی مداخلت اور انصاف کے عمل کو متاثر کرنے کے خدشات بھی سامنے آ رہے ہیں۔ اسلام میں کسی بھی انسان، خصوصاً عورت، پر ظلم، تشدد اور ناحق قتل کو سخت ترین جرم قرار دیا گیا ہے، جبکہ بغیر غسل، کفن اور نماز جنازہ کے تدفین جیسے اقدامات اسلامی احکامات کی صریح خلاف ورزی ہیں۔ انہوں نے حکومت سندھ، ضلعی انتظامیہ اور قانون نافذ کرنے والے اداروں سے مطالبہ کیا کہ اس افسوسناک واقعے کی شفاف اور غیر جانبدارانہ تحقیقات کی جائیں
یہ بھی پڑھیں : خلیجی ممالک کو سوچنا ہوگا امریکی اڈے ان کے لیئے نقصان کا باعث ہیں، مولانا فضل الرحمٰن
علامہ مقصود ڈومکی نے مطالبہ کیا کہ اصل ملزمان کو فوری گرفتار کرکے قرار واقعی سزا دی جائے۔ متاثرہ خاندان کے دیگر افراد، خصوصاً خواتین اور بچوں کو تحفظ فراہم کیا جائے۔ انصاف کے عمل میں کسی بھی قسم کی مداخلت کو روکا جائے۔ انہوں نے کہا کہ یہ واقعہ صرف ایک خاندان کا نہیں، بلکہ پورے معاشرے کے ضمیر کا امتحان ہے۔ اگر ایسے جرائم پر خاموشی اختیار کی گئی تو یہ ظلم مزید پھیل سکتا ہے۔ ہم واضح کرنا چاہتے ہیں کہ غیرت کے نام پر بے گناہ انسانوں کا قتل دراصل کھلی بے غیرتی اور درندگی ہے، جس کی کوئی اخلاقی، دینی یا قانونی حیثیت نہیں۔
The post غیرت کے نام پر بے گناہ انسانوں کا قتل درندگی ہے، علامہ مقصود ڈومکی appeared first on شیعہ نیوز پاکستان.
