شیعہ نیوز: مجلس وحدت مسلمین پاکستان کے چیئرمین اور سینیٹ میں قائد حزب اختلاف علامہ راجہ ناصرعباس جعفری نے اپنے بیان میں کہا ہے کہ پاکستان تحریک انصاف اور تحریک تحفظ آئین پاکستان کے رہنما سابق اسپیکر قومی اسمبلی اسد قیصر کو اسکردو میں انتخابی مہم کے لیے جاتے ہوئے اسلام آباد ایئرپورٹ پر روکنا نہ صرف افسوسناک بلکہ جمہوری اقدار اور سیاسی آزادیوں کی کھلی خلاف ورزی ہے۔
گلگت بلتستان میں دیگر سیاسی جماعتوں کے وفاقی وزراء اور رہنما بھرپور انتخابی مہم چلا رہے ہیں، لیکن پاکستان تحریک انصاف اور تحریک تحفظِ آئین پاکستان کے رہنماؤں کو مسلسل نشانہ بنایا جا رہا ہے۔
یہ بھی پڑھیں : سربراہ شیعہ علماء کونسل و اسلامی تحریک پاکستان علامہ سید ساجد علی نقوی کی اہلیہ محترمہ رحلت فرماگئیں
کل پی ٹی آئی خیبرپختونخوا کے صدر جنید اکبر خان کو گلگت میں روکا گیا اور آج اسد قیصر کو سفر سے روک دیا گیا۔ اگر ایک مخصوص جماعت کے رہنماؤں کو انتخابی مہم چلانے کے بنیادی جمہوری حق سے محروم کیا جائے تو پھر شفاف انتخابات اور سیاسی برابری کے دعوے اپنی حیثیت کھو دیتے ہیں۔
ایسے اقدامات سیاسی اختلاف کو ختم نہیں کرتے بلکہ معاشرے میں مزید نفرت، تقسیم اور بے اعتمادی کو جنم دیتے ہیں۔ ملک کو استحکام، برداشت اور جمہوری روایات کی ضرورت ہے، نہ کہ سیاسی انتقام اور یکطرفہ پابندیوں کی۔ سوال یہ ہے کہ آخر ملک کو کس سمت لے جایا جا رہا ہے؟
The post قائد حزب اختلاف سینیٹ آف پاکستان علامہ راجہ ناصرعباس کا پی ٹی آئی قیادت کو گلگت بلتستان میں انتخابی مہم سے روکنے پراظہار برہمی appeared first on شیعہ نیوز پاکستان.
