شیعہ نیوز: مجلسِ وحدت مسلمین پاکستان کے چیئرمین و قائد حزب اختلاف سینیٹ سینیٹر علامہ راجہ ناصر عباس جعفری نے محرم الحرام کے موقع پر اپنے پیغام میں کہا ہے کہ یہ مہینہ امام مظلوم کربلا کا مہینہ ہے۔یہ خاندان رسالت کی ظالموں، غاصبوں اور باطل حکمرانوں کے خلاف جرات و استقامت کی یاد دلاتا ہے۔
سانحہ کربلا انسانی اصولوں کی معراج کا اپنے اندر عظیم فلسفہ سمیٹے ہوئے ہے۔امام برحق نے دین اسلام کو بچانے کے لیے اپنے اقربا و جانثاران کی قربانی پیش کر کے عالم اسلام کو رہتی دنیا تک یہ درس دیا ہے کہ جب بھی دین اسلام پر حملہ ہو غیرت و حمیت اور عبودیت کا یہ تقاضا ہے کہ دین کے دفاع میں اپنا سب کچھ اگر قربان بھی کرنا پڑے تو اسے سعادت سمجھ کر کر دیا جانا چاہیے۔دین اسلام کی سربلندی کے لیے دی گئی قربانی کی تاریخ میں ایسی کوئی دوسری مثال موجود نہیں۔
نواسہ رسولﷺ امام عالی مقام کی محبت امت کے ہر فرد پر قرض ہے اور باعث نجات ہے۔آج طاغوتی و استعماری طاقتیں دین اسلام پر حملہ آور ہیں۔ثقافتی یلغار اور ٹیکنالوجی کے ذریعے اسلامی قدروں کو مسخ کرنے کی کوشش کی جا رہی ہے۔امت مسلمہ کو ایک دوسروں سے دست وگریباں کرنے کے لیے پروپیگنڈے کے ہتھیار کو استعمال کیا جا رہا ہے۔
یہ وقت دانش و بصیرت کا ہے۔اسلام کے تمام مکاتب فکر باہمی جذبات کا احترام کریں۔علمی و تاریخی اختلافات پر الجھنے کی بجائے ٹھنڈے دماغ اور وسیع القلبی کے ساتھ حقائق کو جانچنے کی کوشش ہونی چاہئے تاکہ انتشار ہیدا کرنے والے گروہ اپنے مذموم مقاصد میں ناکام رہیں۔
یہ بھی پڑھیں : زائر سید الشہداء کا جناب محسن نقوی کے نام کھُلا خط
انہوں نے کہا کہ عزاداری ہماری عبادت اور ہمارا آئینی حق ہے ۔ عزاداروں کو مطلوبہ سہولیات کی فراہمی حکومت کی ذمہ داری ہے۔انہوں نے کہا کہ محرم الحرام 1448 ہجری ایسے وقت میں آ رہا ہے جب امت مسلمہ کو بے شمار داخلی و خارجی چیلنجز کا سامنا ہے۔ ایران، فلسطین، غزہ، لبنان، یمن، شام و عراق اور دیگر خطوں میں مسلمانوں پر جاری مظالم پوری امت کے لیے لمحۂ فکریہ ہیں۔ امام حسینؑ کا پیغام ہمیں ظلم، جبر، استبداد اور سامراجی قوتوں کے سامنے ڈٹ جانے کا حوصلہ دیتا ہے۔
آج ضرورت اس امر کی ہے کہ امت مسلمہ واقعۂ کربلا کی حقیقی روح کو سمجھتے ہوئے وحدت، اخوت، بصیرت اور مزاحمت کے راستے کو اختیار کرے۔علامہ راجہ ناصر عباس جعفری نے کہا کہ محرم الحرام 1448 ہجری کے دوران تمام عزادارانِ امام حسینؑ ضابطۂ اخلاق، قانون اور باہمی احترام کو ملحوظ خاطر رکھیں۔
مجالس و جلوس ہائے عزا کے انعقاد میں نظم و ضبط، صفائی، امن و امان اور شہری حقوق کا خاص خیال رکھا جائے۔ علماء، ذاکرین اور خطباء اپنی تقاریر میں اتحادِ امت، سیرتِ اہل بیتؑ اور اصلاحِ معاشرہ کے موضوعات کو اجاگر کریں تاکہ محرم الحرام کا پیغام زیادہ مؤثر انداز میں معاشرے تک پہنچ سکے۔انہوں نے وفاقی و صوبائی حکومتوں سے مطالبہ کیا کہ مجالس و جلوسوں کے روٹس پر سیکیورٹی، بجلی، پانی، صفائی ستھرائی، طبی سہولیات اور ٹریفک انتظامات کو یقینی بنایا جائے۔
عزاداروں کے جان و مال کے تحفظ کے لیے تمام متعلقہ ادارے اپنی ذمہ داریاں بھرپور انداز میں ادا کریں تاکہ محرم الحرام کے مقدس ایام پرامن اور باوقار ماحول میں منعقد ہو سکیں
۔انہوں نے کہا کہ امام حسینؑ اور شہدائے کربلا کی قربانیاں رہتی دنیا تک حق و باطل کے درمیان واضح خطِ امتیاز رہیں گی۔ محرم الحرام 1448 ہجری ہمیں اس عہد کی تجدید کا موقع فراہم کرتا ہے کہ ہم ظلم، ناانصافی، فرقہ واریت اور نفرت کے خلاف آواز بلند کرتے ہوئے عدل، انسانیت، اخوت اور اسلامی اقدار کے فروغ کے لیے اپنا کردار ادا کریں گے۔
The post ماہ محرم الحرام خاندان رسالت کی ظالموں، غاصبوں اور باطل حکمرانوں کے خلاف جرات و استقامت کی یاد دلاتا ہے،علامہ راجہ ناصرعباس appeared first on شیعہ نیوز پاکستان.
