شیعہ نیوز: میئر کراچی کے ترجمان اور کراچی میٹروپولیٹن کارپوریشن میں پاکستان پیپلز پارٹی کے پارلیمانی لیڈر کرم اللہ وقاصی نے کہا ہے کہ سندھ حکومت کی خصوصی ہدایات اور عوامی خدمت کے وژن کے تحت محرم الحرام کے دوران عزاداروں کو ہر ممکن سہولت کی فراہمی اور امن و امان کے قیام کے لیے جامع انتظامات کیے جا رہے ہیں، محرم الحرام کے مقدس ایام میں شہری خدمات کی بلاتعطل فراہمی، جلوسوں اور مجالس کے راستوں پر صفاءی ستھرائی، روشنی، پانی اور نکاسی آب کے انتظامات کو ترجیحی بنیادوں پر مکمل کیا جا رہا ہے۔ ترجمان میئر کراچی کرم اللہ وقاصی نے کہا کہ کراچی میٹروپولیٹن کارپوریشن اور دیگر متعلقہ بلدیاتی ادارے محرم الحرام کے دوران اپنی تمام ذمہ داریاں بھرپور انداز میں انجام دینے کے لیے متحرک ہیں۔
ان کا کہنا تھا کہ میئر کراچی بیرسٹر مرتضیٰ وہاب کی خصوصی ہدایات پر کراچی کی تمام امام بارگاہوں کے اطراف لائٹس، پیور بلاکس کی تنصیب کا کام جاری ہے، جلوسوں اور مجالس کے روٹس پر صفائی کے خصوصی اقدامات کیے جا رہے ہیں جبکہ اسٹریٹ لائٹس کی مرمت اور تنصیب، پینے کے صاف پانی کی دستیابی اور سیوریج کے نظام کی بہتری کے لیے متعلقہ محکمے فیلڈ میں موجود ہیں۔ انہوں نے کہا کہ پیپلز پارٹی حکومت عزاداروں کے لیے پرامن اور سہولتوں سے آراستہ ماحول کی فراہمی کو اپنی اولین ترجیح سمجھتی ہے، اسی مقصد کے تحت تمام اداروں کے درمیان مؤثر رابطہ کاری اور انتظامی ہم آہنگی کو یقینی بنایا جا رہا ہے تاکہ کسی بھی قسم کی دشواری یا خلل پیدا نہ ہو۔
یہ بھی پڑھیں : محرم الحرام کے دوران کراچی میں سیکیورٹی کے غیر معمولی انتظامات، حساس مقامات پر کڑی نگرانی کا فیصلہ
ترجمان میئر کراچی کرم اللہ وقاصی نے کہا کہ حکومت کی جانب سے بجلی کی فراہمی سے متعلق اداروں کو بھی ہدایت کی گئی ہے کہ مجالس اور جلوسوں کے دوران بلا تعطل بجلی کی فراہمی یقینی بنائی جائے اور مذہبی اجتماعات کے دوران لوڈشیڈنگ سے گریز کیا جائے تاکہ عزادار اپنے مذہبی فرائض پرسکون ماحول میں ادا کر سکیں۔ انہوں نے کہا کہ سیکورٹی ادارے، ضلعی انتظامیہ اور بلدیاتی محکمے باہمی تعاون کے ساتھ محرم الحرام کے دوران عوامی سہولتوں اور امن و امان کی صورتحال کو یقینی بنانے کے لیے مکمل طور پر متحرک ہیں۔
انہوں مزید نے کہا کہ حساس مقامات پر خصوصی توجہ دی جا رہی ہے جبکہ ٹریفک کی روانی برقرار رکھنے اور شہریوں کو متبادل راستوں کے بارے میں بروقت آگاہی فراہم کرنے کے اقدامات بھی کیے جا رہے ہیں۔ ترجمان میئر کراچی کرم اللہ وقاصی نے کہا کہ پاکستان پیپلز پارٹی کی قیادت عوامی خدمت اور مذہبی ہم آہنگی کے فروغ پر یقین رکھتی ہے، سندھ حکومت اور کراچی میٹروپولیٹن کارپوریشن محرم الحرام کے دوران عزاداروں اور شہریوں کو بہترین سہولیات کی فراہمی کے لیے تمام دستیاب وسائل بروئے کار لا رہی ہیں تاکہ یہ مقدس ایام مکمل احترام، نظم و ضبط اور عقیدت کے ساتھ گزارے جا سکیں۔
The post محرم الحرام میں عزاداران امام حسینؑ کو سہولیات کی فراہمی یقینی بنائی جائے گی، ترجمان میئر کراچی appeared first on شیعہ نیوز پاکستان.
