شیعہ نیوز: مجلس وحدت مسلمین پاکستان کے مرکزی رہنماء علامہ مقصود علی ڈومکی نے کہا ہے کہ مجلس وحدت مسلمین پاکستان قائد شہید علامہ عارف حسین الحسینیؒ اور رہبر کبیر انقلاب اسلامی حضرت امام خمینیؒ کے افکار و نظریات کی روشنی میں اتحاد امت، دفاعِ مظلومین، بیداری ملت اور اسلامی اقدار کے فروغ کے لئے جدوجہد کر رہی ہے۔ ان خیالات کا اظہار انہوں نے مجلس وحدت مسلمین پاکستان ضلع سکھر کے ضلعی کنونشن سے خطاب کرتے ہوئے کیا۔ اس موقع پر ضلع بھر سے کارکنان، علماء کرام، اور تنظیمی ذمہ داران نے بھرپور شرکت کی۔
تقریب میں شوریٰ اراکین نے کثرت رائے سے ایڈوکیٹ احسان علی شر کو ضلع سکھر کا ضلعی صدر منتخب کیا۔ جس کے بعد نومنتخب ضلعی صدر سے صوبائی آرگنائزر علامہ مقصود علی ڈومکی نے حلف لیا۔ کنونشن میں مجلس وحدت مسلمین سندھ کے صوبائی آرگنائزر علامہ مقصود علی ڈومکی، صوبائی آرگنائزنگ کمیٹی کے اراکین مولانا عمران علی چانڈیو، اصغر علی سیٹھار، چوہدری اظہر حسن مولانا منور حسین سولنگی اور فدا عباس لاڑک نے خصوصی شرکت کی اور انتخابی عمل کی نگرانی کی۔
اس موقع پر خطاب کرتے ہوئے علامہ مقصود علی ڈومکی نے کہا کہ رہبر شہید حضرت آیت اللہ خامنہ ای عصر حاضر کے عظیم انقلابی لیڈر تھے، جنہوں نے چار دھائیوں تک امت مسلمہ اور ایران کی رہبری کی۔ رہبر شہید نے ایرانی قوم میں بیداری شعور اور راہ حق میں صبر و استقامت کا جذبہ عروج پر پہنچایا۔ انہوں نے کہا کہ 13 جون کو رہبر شہید کی یاد میں مینار پاکستان پر منعقد ہونے والے ملک گیر اجتماع میں، ملک بھر کی طرح سندھ بھر سے کارکنان بھرپور شرکت کرکے رہبر مسلمین جہان کے ساتھ تجدید عہد کریں گے۔
یہ بھی پڑھیں : اسلامی تحریک پاکستان کے مرکزی قائدین سکردو پہنچ گئے، انتخابی مہم میں حصہ لیں گے
اجلاس سے صوبائی رہنما چوہدری اظہر حسن، نو منتخب ضلعی صدر ایڈوکیٹ احسان علی شر ایڈوکیٹ، محسن سجاد اور مولانا سید اسلم شاہ موسوی نے خطاب کرتے ہوئے کہا کہ موجودہ حالات میں امت مسلمہ کو اتحاد، تنظیم، شعور اور فکری بیداری کی اشد ضرورت ہے اور مجلس وحدت مسلمین اسی مقصد کے تحت عوامی خدمت اور دینی و ملی ذمہ داریوں کو ادا کر رہی ہے۔ انہوں نے کارکنان پر زور دیا کہ وہ تنظیمی استحکام، عوامی رابطوں، نوجوان نسل کی فکری و نظریاتی تربیت اور خدمت خلق کے میدان میں مزید متحرک کردار ادا کریں تاکہ معاشرے میں مثبت تبدیلی لائی جا سکے۔ نو منتخب صدر نے ضلع سکھر میں تنظیمی فعالیت کو مزید مؤثر اور فعال بنانے کے عزم کا اظہار کیا۔
The post مینار پاکستان کے سائے میں شہید رہبر سے تجدید عہد کرینگے، علامہ مقصود ڈومکی appeared first on شیعہ نیوز پاکستان.
