شیعہ نیوز: سویڈن کے دارالحکومت اسٹاک ہوم میں بدھ کے روز اس وقت بڑے پیمانے پر احتجاجی مظاہرے پھوٹ پڑے جب شہر میں روایتی نوبل ضیافت کا انعقاد کیا جا رہا تھا۔ یہ ضیافت نوبل انعامات کی تقسیم کے بعد منعقد ہوتی ہے۔
مظاہرین نے اسرائیل کی جانب سے گذشتہ دو برسوں سے غزہ پر جاری وحشیانہ حملوں اور امریکہ کی جانب سے وینزویلا پر ممکنہ فوجی یلغار کی تیاریوں کے خلاف بھرپور آواز اٹھائی۔
مظاہرین اسٹاک ہوم سٹی ہال کے سامنے جمع ہوئے جہاں سویڈن کے بادشاہ کارل گستاف شانزدہم نے نوبل ضیافت کا اہتمام کیا تھا۔ اس موقع پر شرکا نے سویڈش اور انگریزی زبانوں میں امریکہ اور اسرائیل کے خلاف نعرے لگائے اور سویڈن کی پالیسیوں پر بھی شدید تنقید کی۔ ان کے فلک شگاف نعروں میں “غزہ میں نسل کشی بند کرو” اور “وینزویلا کو تنگ نہ کرو” کےنعرے شامل تھے۔
یہ بھی پڑھیں : فلسطینیوں کی مصائب سے نظریں چرانا انسانیت کی کھلی توہین ہے، پیدرو سانیچیز
مظاہرے میں شریک افراد نے بینرز اٹھا رکھے تھے جن پر “فلسطین سے نکل جاؤ اے اسرائیل”، “قبضہ ختم کرو”، اور “جب معصوموں کا خون بہہ رہا ہو تو نوبل کی تقریب نہیں ہو سکتی” جیسے نعرے درج تھے۔
یہ احتجاج اس پس منظر میں کیا گیا کہ نوبل امن انعام وینزویلا کی اپوزیشن رہنما ماریا کورینا ماچاڈو کو دیا گیا ہے۔ مظاہرین نے ان پر الزام لگایا کہ وہ غزہ میں اسرائیلی جارحیت کی حمایت کرتی ہے اور امریکہ کی جانب سے وینزویلا پر فوجی حملے کی تیاریوں کی بھی تائید کرتی ہے۔
مظاہرین کی جانب سے جاری ایک بیان میں کہا گیا کہ ماچاڈو نے اپنا انعام امریکی صدر ڈونلڈ ٹرمپ کے نام کر دیا اور انہیں بنجمن نیتن یاھو کی طرف سے ذاتی مبارک باد بھی موصول ہوئی۔
بیان میں مزید کہا گیا کہ اسرائیل نے 10 اکتوبر کو فلسطین کے ساتھ ہونے والے امن معاہدے کی بھی پاسداری نہیں کی اور غزہ اور مغربی کنارے پر حملے بدستور جاری ہیں جس سے عام شہریوں کی اذیت میں خوفناک اضافہ ہورہا ہے اور یہ تمام صورت حال قابض حکومت کے مسلسل ظلم و جبر کا ثبوت ہے۔
The post نوبل ایوارڈ تقریب کے بعد اسٹاک ہوم میں غزہ سے اظہارِ یکجہتی، ہزاروں افراد کا بھرپور احتجاج appeared first on شیعہ نیوز پاکستان.
