شیعہ نیوز: انجمنِ مؤمنین، چارسدہ کی جانب سے تنگی سے تعلق رکھنے والے بعض مومنین کو مبینہ طور پر مسلسل ہراساں اور خوفزدہ کیے جانے کے واقعات پر گہری تشویش کا اظہار کیا جاتا ہے۔
اطلاعات کے مطابق بعض تکفیری اور امن دشمن عناصر عام عوام کو گمراہ کرنے اور معاشرے کے پُرامن ماحول کو دانستہ طور پر متاثر کرنے کی کوشش کر رہے ہیں۔ مبینہ طور پر یہ عناصر ٹولیوں کی صورت میں مومنین کے گھروں پر جا کر ان کے مذہبی عقائد کے بارے میں سوالات کرتے، توہین آمیز رویہ اختیار کرتے اور انہیں خوفزدہ و دھمکانے کی کوشش کرتے ہیں۔
یہ بھی پڑھیں : پاکستان کی افغانستان میں طالبان کے خلاف پھر فضائی کارروائی، متعدد دہشتگرد جہنم واصل
کسی بھی فرد یا گروہ کو یہ حق حاصل نہیں کہ وہ کسی شہری کے گھر جا کر اس کے عقائد کی تفتیش کرے، اسے دباؤ میں لائے یا خوف و ہراس میں مبتلا کرے۔ اگر کسی کے خلاف کوئی شکایت یا اعتراض ہے تو اس کے لیے ریاستی ادارے اور قانونی طریقۂ کار موجود ہیں۔ کسی کو بھی قانون اپنے ہاتھ میں لینے اور شہریوں کے بنیادی حقوق پامال کرنے کی اجازت نہیں دی جا سکتی۔
ہم اربابِ اختیار، ڈپٹی کمشنر چارسدہ جناب فضل الرحیم مروت، آر پی او مردان جناب قاسم علی خان، ڈی پی او چارسدہ رفعت اللّٰه خان، اسسٹنٹ کمشنر تنگی اخلاق احمد، اور متعلقہ ڈی ایس پی تنگی سرکل جواد خان صاحب سے پُرزور مطالبہ کرتے ہیں کہ اس معاملے کا فوری نوٹس لیتے ہوئے تنگی کے مومنین اور ان کے خاندانوں کے جان و مال کے تحفظ کو یقینی بنایا جائے اور قانون کی خلاف ورزی کرنے والے عناصر کے خلاف قانون کے مطابق کارروائی عمل میں لائی جائے۔
ہم کسی خصوصی رعایت یا غیر قانونی مطالبے کے خواہاں نہیں، بلکہ بحیثیت پاکستانی شہری اپنے آئینی و قانونی حقوق اور تحفظ کا مطالبہ کر رہے ہیں۔
خدانخواستہ کسی ناخوشگوار واقعے کے رونما ہونے سے پہلے بروقت اور مؤثر اقدامات کیے جائیں، تاکہ علاقے کا پُرامن ماحول، باہمی احترام اور امن و امان ہر صورت برقرار رہے۔
The post چار سدہ، مومنین کے خلاف تکفیری گروہ کا پروپیگنڈا جاری ، علاقے میں نقص امن کا خطرہ appeared first on شیعہ نیوز پاکستان.
