شیعہ نیوز: اسلامک کلچر اینڈ ریسرچ ٹرسٹ کے زیرِ اہتمام تحقیقی ادارہ ’’سلونی‘‘ کی افتتاحی تقریب کراچی کے آئی آر سی امام بارگاہ میں منعقد ہوئی، جس میں علمی، دینی اور تحقیقی حلقوں سے تعلق رکھنے والی ممتاز شخصیات نے شرکت کی۔ افتتاحی نشست کے مرکزی مرحلے میں معروف محقق، خطیب اور مفکر علامہ ابن حسن جارچویؒ کی حیات، علمی خدمات اور فکری ورثے پر مبنی کتاب کی باقاعدہ رونمائی کی گئی۔ اس موقع پر ایک علمی و فکری پینل ڈسکشن بھی منعقد ہوا جس سے نامور ذاکر اہل بیتؑ علامہ سید باقر حسین زیدی اور سینئر محقق و استاد پروفیسر سید شہاب تہذیب جعفری نے خطاب کیا۔ مقررین نے اپنے خطاب میں کہا کہ علامہ ابن حسن جارچویؒ کی علمی، تحقیقی اور خطابی خدمات برصغیر کے دینی و فکری منظرنامے کا ایک روشن اور قابلِ فخر باب ہیں، ان کا فکری اسلوب، تحقیقی بصیرت اور دعوتی کردار نئی نسل کے لیے مشعلِ راہ کی حیثیت رکھتا ہے۔
انہوں نے تحقیقی ادارہ سلونی کے قیام کو خوش آئند قرار دیتے ہوئے کہا کہ یہ ادارہ تحقیق، مکالمے اور فکری تربیت کے فروغ میں ایک مؤثر اور مضبوط پلیٹ فارم ثابت ہوگا۔ مقررین نے افتتاحی تقریب کے کامیاب انعقاد پر منتظمین کو مبارکباد بھی پیش کی۔ تقریب کے اختتام پر شرکاء نے تحقیقی ادارہ سلونی کے قیام کو علمی دنیا کے لیے ایک مثبت اور اہم پیش رفت قرار دیا اور اس امید کا اظہار کیا کہ یہ ادارہ مستقبل میں تحقیق اور فکر کے نئے زاویے متعارف کراتے ہوئے علمی میدان میں نمایاں کردار ادا کرے گا۔
The post کراچی، اسلامک کلچر اینڈ ریسرچ ٹرسٹ کے زیرِ اہتمام تحقیقی ادارہ ’’سلونی‘‘ کی افتتاحی تقریب appeared first on شیعہ نیوز پاکستان.
