شیعہ نیوز: فلسطینی وزارت صحت نے اعلان کیا ہے کہ غزہ کی پٹی پر جاری اسرائیل کی وحشیانہ جارحیت کے نتیجے میں گذشتہ 24 گھنٹوں کے دوران 7 شہداء اور 18 زخمیوں کو غزہ کی پٹی کے ہسپتالوں میں لایا گیا، جن میں سے ایک شہید کی میت ملبے کے نیچے سے نکالی گئی ہے۔
وزارت صحت نے آج اپنی روزانہ کی شماریاتی رپورٹ میں بتایا کہ 10 اکتوبر کو ہونے والی جنگ بندی کے بعد سے اب تک شہداء کی مجموعی تعداد 817 ہو گئی ہے جبکہ زخمیوں کی تعداد 2296 تک پہنچ گئی ہے اور اس دوران ملبے سے نکالے گئے شہداء کی کل تعداد 762 ہو چکی ہے۔
رپورٹ میں مزید کہا گیا کہ 7 اکتوبر سنہ 2023ء سے شروع ہونے والی اس نسل کشی اور جارحیت کے آغاز سے اب تک شہداء کی مجموعی تعداد بڑھ کر 72,593 ہو گئی ہے جبکہ زخمیوں کی تعداد 172,399 تک جا پہنچی ہے۔
یہ بھی پڑھیں : غزہ کا ظالمانہ محاصرہ توڑنے کے لیے گلوبل صمود فلوٹیلا کا مشن ربیع سنہ 2026ء صقلیہ سے روانہ
دوسری جانب اسرائیلی افواج نے گذشتہ رات کے آخری پہر سے آج پیر کی صبح تک مقبوضہ مغربی کنارے کی مختلف گورنریوں میں بڑے پیمانے پر ایک وسیع فوجی مہم چلائی، جس میں پورے پورے دیہات اور پناہ گزین کیمپوں کو جارحیت کا نشانہ بنایا گیا۔
قابض دشمن کی ان کارروائیوں کے نتیجے میں درجنوں شہریوں کو گرفتار کر لیا گیا، جن میں نو عمر لڑکے، سابق اسیران اور ان کے اہل خانہ بھی شامل ہیں۔ یہ مہم ایک منظم اور طے شدہ پالیسی کا حصہ ہے جس کا مقصد فلسطینیوں کے گرد گھیرا تنگ کر کے ان کے وجود کو مٹانا اور نسل کشی کے عمل کو آگے بڑھانا ہے۔
مقبوضہ بیت المقدس کے شمال میں واقع قلندیا کیمپ اور کفر عقب کا قصبہ ان کارروائیوں کا مرکز رہے۔ یہاں قابض اسرائیلی فوج نے اجتماعی تشدد کی بدترین مثال قائم کرتے ہوئے تقریباً 30 شہریوں کو حراست میں لیا اور انہیں فیلڈ انٹرویو کے نام پر سخت اذیت کا نشانہ بنایا۔
الخلیل گورنری میں قابض دشمن نے شمال میں واقع بیت امر قصبے کو نشانہ بنایا۔ یہاں قابض اسرائیل کی سفاکیت سے کمسن لڑکے بھی محفوظ نہ رہے اور 16 سالہ ودیع سامی عوض، 16 سالہ ایہم ابو ماریہ اور 17 سالہ محمد یحییٰ عوض کو اغوا کر کے قصبے کی زمینوں پر زبردستی تعمیر کی گئی غیر قانونی بستی کرمی تسور میں قائم فوجی کیمپ منتقل کر دیا گیا۔
بیت لحم میں بھی گرفتاریوں کا جال بچھایا گیا جہاں قابض دشمن نے 55 سالہ احمد حساسنہ کو گرفتار کیا جو پہلے ہی اسرائیلی گولیوں سے زخمی اور معذور ہیں۔ اس کے علاوہ شواورہ گاؤں سے الیاس قمصیہ اور ان کے بیٹے رونی کو بھی حراست میں لے لیا گیا۔
میدانی صورت حال کے مطابق قابض فوج نے جنین کے مغرب اور جنوب میں واقع دیہات العرقہ اور یعبد میں گھروں کے اندر گھس کر توڑ پھوڑ کی اور قیمتی سامان لوٹ لیا۔ اسی طرح نابلس کے مشرق میں بلاطہ کیمپ میں بھی وحشیانہ کارروائیاں کی گئیں۔
The post گذشتہ 24 گھنٹوں کےدوران غزہ میں مزید سات فلسطینی شہید، 18 زخمی ہسپتالوں میں منتقل appeared first on شیعہ نیوز پاکستان.
