شیعہ نیوز: دمام کے بین الاقوامی شاہ فہد ہوائی اڈے کی 53 پروازیں منسوخ، سعودی حکام نے حملے کی تصدیق کرتے ہوئے نقصان کا تخمینہ لگانے کا عمل شروع کر دیا۔
رپورٹ کے مطابق سعودی عرب کے شہر دمام میں شاہ فہد بین الاقوامی ہوائی اڈے پر یمنی فوج کے نئے حملے اور فضائی آمدورفت میں خلل کی اطلاع دی ہے۔
ذرائع کے مطابق، فلائٹ ریڈار کے اعداد و شمار سے ظاہر ہوتا ہے کہ شاہ فہد ہوائی اڈے پر پروازوں کا نظام ایک بار پھر تعطل اور بے نظمی کا شکار ہوگیا ہے۔
اتوار کی صبح سے اب تک 53 پروازیں منسوخ کی جاچکی ہیں، جبکہ ہوائی اڈے کے اطراف فضا میں انتظار کرنے یا رکی ہوئی بعض پروازوں کا رخ القصیم ایئرپورٹ کی جانب موڑ دیا گیا ہے۔
یہ بھی پڑھیں : قطر، ایران کے ساتھ واضح تعلقات قائم کرنے کی کوشش کر رہے ہیں، حمد بن جاسم
سعودی عرب کی شہری ہوا بازی کی اتھارٹی نے بھی دمام کے شاہ فہد بین الاقوامی ہوائی اڈے کو نشانہ بنائے جانے کی تصدیق کی ہے۔ اتھارٹی کے مطابق، متعلقہ اداروں کے ساتھ رابطے میں ہوائی اڈے کو پہنچنے والے نقصان کا جائزہ لینے اور تنصیبات کی حفاظت کا معائنہ کرنے کا عمل جاری ہے۔
دوسری جانب سعودی شہری ہوا بازی کی اتھارٹی کے مطابق، شاہ خالد بین الاقوامی ہوائی اڈے پر حملے میں جانی و مالی نقصان ہوا، زخمیوں کو اسپتال منتقل کر دیا گیا۔
رپورٹ کے مطابق سعودی عرب کی شہری ہوا بازی کی اتھارٹی نے اعلان کیا ہے کہ ریاض کے شاہ خالد بین الاقوامی ہوائی اڈے کو نشانہ بنانے والے حملے میں ایک پاکستانی شہری ہلاک اور 11 دیگر افراد زخمی ہوگئے۔
سعودی اتھارٹی کی جانب سے جاری ہونے والے بیان کے مطابق، زخمیوں کو فوری طور پر طبی امداد کے لیے اسپتال منتقل کر دیا گیا۔ حملے کے نتیجے میں مالی نقصان بھی ہوا ہے، جس کی تفصیلات کا جائزہ لیا جا رہا ہے۔
The post یمن کے حملے کے بعد سعودی عرب کے شاہ فہد ہوائی اڈے پر پروازیں متاثر appeared first on شیعہ نیوز پاکستان.
