شیعہ نیوز: چکوال : یونیورسٹی آف چکوال کے انٹرنیشنل ریلیشنز (IR) ڈیپارٹمنٹ کی طرف سے منعقدہ اسٹریٹجک کانفرنس میں اسرائیلی جھنڈے کی موجودگی کے حوالے سے پیدا ہونے والے تنازع پر یونیورسٹی کی جانب سے وضاحت سامنے آئی ہے ۔
اس وضاحتی بیان میں یونیورسٹی آف چکوال واضح طور پر بیان کرتی ہے کہ اس کی مذکورہ کانفرنس میں اسرائیلی جھنڈے کا موجود ہونا ہرگز اسرائیل کے تشخص کو اجاگر کرنا یا اس کی تائید کرنا نہیں تھا۔
بلکہ طلبہ و طالبات کو اس حقیقت سے آگاہ کرنا تھا کہ اسرائیل امت مسلمہ کے لیے، بالخصوص پاکستان کے لیے ایک سنگین خطرہ ہے اور وہ غزہ کے مظلوم مسلمانوں پر سنگین ظلم و جبر کر رہا ہے۔ کانفرنس کا بنیادی مقصد طلبہ میں شعور اجاگر کرنا اور انہیں موجودہ جیو پولیٹیکل صورتحال کی درست تناظر میں سمجھ بوجھ فراہم کرنا تھا۔
اس کانفرنس میں امریکہ، چین، بھارت، ایران سمیت پاکستان کی بھی دفاعی قوت کا تجزیہ کیا گیا تھا تاکہ انٹرنیشنل ریلیشنز کے طلبہ اور طالبات دوست مُمالک سمیت دشمنوں کی دفاعی قوت سے بھی آگاہ رہیں۔
سوشل میڈیا پر اس سے متعلق گردش کردہ خبریں حقائق سے لاعلمی کے نتیجے میں پیدا ہونے والی غلط فہمی کا نتیجہ ہیں لہذا درست حقائق کو عوام الناس کے علم میں لانا اور ادارے کا واضح موقف پیش کرنا یونیورسٹی انتظامیہ اپنی اہم ذمہ داری سمجھتی ہے۔
یہ بھی پڑھیں : شمالی محاذ پر زخمیوں کی تعداد 882 تک پہنچ گئی، صہیونی وزارت صحت
یونیورسٹی آف چکوال اس موقف پر پوری طرح واضح ہے کہ قوم بانئِ پاکستان قائد اعظم محمد علی جناح کے اسرائیل سے متعلق بیان کے ساتھ سیسہ پلائی ہوئی دیوار کی مانند کھڑی ہے۔
قائد اعظم نے واضح طور پر فلسطینی ریاست کیلئے مسلمانوں کے حقِ خود ارادیت کی حمایت کی اور فلسطین میں یہودی ریاست کے قیام کی مخالفت کی تھی۔ اور جامعہ چکوال کا بھی یہی موقف ہے کہ ایسی ریاست کا قیام مسلمانوں کے حقوق پر ڈاکہ ڈالنے کے مترادف ہے۔ یونیورسٹی بھی اسی اصول پر قائم ہے اور آئندہ بھی بابائے قوم کے اس تاریخی موقف کی پاسداری کرتی رہے گی۔
مزید براں یونیورسٹی آف چکوال طلبہ و طالبات کو تعلیم کے ساتھ ساتھ درست تاریخی اور سیاسی شعور دینے کا عزم رکھتی ہے۔ ہم اپنے طلبہ کو ایسے حقائق سے روشناس کرواتے ہیں جو انہیں باخبر اور ذمہ دار شہری بنائیں۔
The post یونیورسٹی آف چکوال میں اسرائیل کا جھنڈا ، شدید احتجاج کے بعد یونیورسٹی کا موقف سامنے آگیا appeared first on شیعہ نیوز پاکستان.
