شیعہ نیوز: یہ ایف آئی آر پڑھ کے سر شرم کے مارے جھک گیا ہے“اپنے گھر میں مجلس کروا کر دیگر مسالک کے لوگوں کے مذہبی جذبات کو مجروح کیا ہے، جس کی وجہ سے نقصِ امن کا خدشہ ہے”۔افسوس یہ قائد اعظم محمد علی جناح ؒ اور علامہ اقبال ؒ کا مسلم پاکستان کس ڈگر پر چلا پڑا ہے ۔
پنجاب کی متعصب حکومت اور انتظامیہ سالہائے گذشتہ کی طرح اس محرم الحرام میں بھی عزادارن ِ نواسئہ رسولؐ امام حسینؑ کے خلاف جھوٹے اور جعلی پرچے کاٹنے میں مصروف ہے ۔
ایسی ہی ایک ایف آئی آر سرگودھا سے سامنے آئی ہے جہاں پولیس نے خود اپنی مدعیت میں ایک مومن عزاداربہادر خان ولد محمد ریاض قوم کمبوہ سکنہ سدا کمبوہ پر صرف اس جرم میں مقدمہ درج کیا ہے کہ وہ اپنے گھر کی چار دیواری میں رات کو ساڑھے نو بجے مجلس عزائے ذکر امام حسینؑ منعقد کررہا تھا۔
پولیس نے موقف اختیار کیا ہے کہ اس مجلس میں 20سے 25 افراد نامعلوم شریک تھے، تحقیقات پر معلوم ہواکہ اس مجلس کی کوئی سابقہ روایت نہیں تھی۔
بہادرخان نے بمعہ 20،25 نامعلوم افراد یہ مجلس اپنے گھرپر منعقد کرکے دیگر مسالک کے لوگوں کے مذہبی جذبات کو مجروح کیا ہےجس کی وجہ سے نقص امن کا خدشہ ہےلہذٰا قانونی کارروائی کی جائے۔
یہ بھی پڑھیں : سوشل میڈیا پر شیعہ مقدسات کی توہین ، ملزم جاوید اقبال گرفتار، مقدمہ درج
پنجاب میں چار دیواری کے اندر مجلس برپا کرنے والے عزادار پر پرچہ درج کرنے والوں نے بظاہر ریاست کی ترجمانی کی ہے لیکن کیا واقعی ذکرِ حسین ع سے دیگر مسالک کے لوگوں کے جذبات مجروح ہوتے ہیں؟؟ کیا ہم شام میں ہیں؟ کیا یہ بنو امیہ اور بنو عباس کا دور حکومت ہے ؟؟کیا یہاں واقعی آج بھی نواسہء رسول ص کا ذکر ناگواری کا سبب ہے؟؟
حیرت ہے ہمارے ملک میں کالعدم تنظیموں کو تو فرقہ واریت اور تکفیر کی ترویج کی مکمل آزادی ہے لیکن ذکر نواسہ رسولؐ کرنے کیلئے سابقہ روایت تلاش کی جاتی ہیں اور مقدمات کے اندراج کیلئے بہانے تلاش کیئے جاتے ہیں۔ ایک طرف وزیر اعلیٰ پنجاب مریم نواز صاحبہ محرم الحرام میں عزاداران حسینی کو مکمل سہولیات کی فراہمی کا دعویٰ کررہی ہیں دوسری جا نب انہیں کی ماتحت پولیس عزاداری امام حسین ؑ کے خلاف روزانہ کی بنیاد پر ایف آئی آرز کاٹنے میں مصروف ہے۔
The post پنجاب حکومت کی مجلس عزا کے خلاف ایسی ایف آئی آرجسے پڑھ کے سر شرم سے جھک جائے appeared first on شیعہ نیوز پاکستان.
