شیعہ نیوز: روسی خبر رساں ادارے انٹرفیکس نے رپورٹ دی ہے کہ روس کی سرکاری جوہری توانائی کمپنی روس ایٹم (Rosatom) جولائی کے وسط سے اپنے عملے کو ایران کے بوشہر ایٹمی بجلی گھر واپس بھیجنے کی تیاری کر رہی ہے۔
فارس نیوز ایجنسی کے مطابق، یہ واپسی اس وقت عمل میں آ رہی ہے جب روس ایٹم نے امریکہ اور اسرائیل کے حملوں کے بعد حفاظتی اقدامات کے تحت اپنے سینکڑوں ملازمین کو اس تنصیب سے نکال لیا تھا۔
رپورٹ میں کہا گیا ہے کہ بوشہر ایٹمی بجلی گھر بدستور ایران اور روس کے درمیان صنعتی تعاون کا ایک اہم مرکز ہے، جبکہ روس ایٹم اس مقام پر مزید دو نئے ایٹمی یونٹس کی تعمیر بھی جاری رکھے ہوئے ہے۔
یہ بھی پڑھیں : یورپ میں گرمی، سپین کے جنگلات میں آگ لگ گئی، 12 افراد ہلاک
انٹرفیکس کے مطابق، اگرچہ جنگ کے ابتدائی مراحل میں اس تنصیب کے اطراف میں حملے کیے گئے تھے، تاہم بوشہر ایٹمی بجلی گھر مجموعی طور پر محفوظ رہا۔
رپورٹ میں مزید کہا گیا ہے کہ روسی ماہرین کی واپسی اس اہم توانائی منصوبے میں معمول کی سرگرمیوں کی بحالی کی جانب ایک اہم قدم سمجھی جا رہی ہے، جو ایران کے توانائی کے بنیادی ڈھانچے کا ایک کلیدی حصہ ہے۔
اس سے قبل روس ایٹم کے ڈائریکٹر جنرل الیکسی لیخاچیوف نے روسی خبر رساں ادارے ریا نووستی سے گفتگو کرتے ہوئے کہا تھا کہ جیسے ہی حملوں کا خطرہ کم سے کم سطح پر پہنچے گا، بوشہر ایٹمی بجلی گھر میں روسی ماہرین کی مرحلہ وار واپسی ممکن ہو جائے گی۔
جنگ کے دوران بوشہر ایٹمی بجلی گھر پر چار مرتبہ دشمن کی جانب سے حملے کیے گئے، تاہم کسی قسم کی تابکار آلودگی یا ریڈیو ایکٹو اخراج کی اطلاع نہیں ملی۔
ان حالات میں 600 سے زائد روسی انجینئرز اور ماہرین نے عارضی طور پر بوشہر چھوڑ دیا تھا، جبکہ تقریباً 20 افراد پر مشتمل ایک مختصر تکنیکی ٹیم حفاظتی نظام اور آلات کی نگرانی کے لیے موقع پر موجود رہی۔
The post روس نے اپنا عملہ بوشہر ایٹمی بجلی گھر واپس بھیجنے کی تیاری مکمل کر لی ہے، انٹرفیکس appeared first on شیعہ نیوز پاکستان.
