شیعہ نیوز: جنوبی یورپ میں جاری شدید گرمی کی لہر کے باعث سپین، فرانس اور پرتگال میں متعدد مقامات پر جنگلاتی آگ بھڑک اٹھی ہے۔
اندلس کی علاقائی حکومت نے ایک بیان میں تصدیق کی کہ جنگلاتی آگ کے باعث 12 لاشیں مل چکی ہیں، بعض متاثرین کی لاشیں ان گاڑیوں سے برآمد ہوئیں جو آگ کی لپیٹ میں آ گئی تھیں۔
عینی شاہدین کا کہنا ہے کہ آگ بجلی کی ایک ہائی ٹینشن لائن گرنے کے باعث لگی اور تیزی سے قریبی جنگلات تک پھیل گئی، تاہم حکام نے تاحال آگ لگنے کی وجہ کی باضابطہ تصدیق نہیں کی۔
یہ بھی پڑھیں : شہید کے قاتلوں کو دیر یا جلد اپنے انجام تک پہنچائیں گے، جنرل عبداللہی
اندلس کے صدر خوانما مورینو نے واقعہ کو ایک بڑا سانحہ قرار دیتے ہوئے کہا کہ یہ المناک حادثہ پورے خطے کے لیے گہرے صدمے کا باعث ہے، آگ پر قابو پانے کے لیے تقریباً 150 فائر فائٹرز علاقے بیدار میں مسلسل امدادی کارروائیوں میں مصروف ہیں۔ جنگلاتی آگ کے باعث متعدد شاہراہیں بند کر دی گئی ہیں، جبکہ ہنگامی امدادی اداروں کے مطابق تقریباً ایک ہزار افراد کو اپنے گھروں سے محفوظ مقامات پر منتقل کیا گیا ہے۔
ہسپانوی وزیراعظم پیڈرو سانچیز نے مئی میں اعلان کیا تھا کہ رواں موسم گرما میں جنگلاتی آگ سے نمٹنے کے لیے ملکی تاریخ کا سب سے بڑا ہنگامی آپریشن تعینات کیا جائے گا، سپین کی ملٹری ایمرجنسی یونٹ (UME) نے بھی لوس گایاردوس میں آگ بجھانے کی کارروائیوں میں حصہ لینے کا اعلان کیا ہے۔
رواں سال جون میں سپین نے 1950ء کے بعد اپنی بلند ترین اوسط یومیہ درجہ حرارت ریکارڈ کیا، جبکہ بعض علاقوں میں درجہ حرارت 42 ڈگری سینٹی گریڈ تک پہنچنے کی پیش گوئی کی گئی تھی۔
ماہرین کا کہنا ہے کہ موسمیاتی تبدیلی کے باعث دنیا بھر میں درجہ حرارت مسلسل بڑھ رہا ہے، جبکہ یورپ دنیا کا وہ خطہ بن چکا ہے جہاں درجہ حرارت عالمی اوسط کے مقابلے میں تقریباً دو گنا تیزی سے بڑھ رہا ہے۔
The post یورپ میں گرمی، سپین کے جنگلات میں آگ لگ گئی، 12 افراد ہلاک appeared first on شیعہ نیوز پاکستان.
