شیعہ نیوز: کراچی: 28 صفر المظفر، رحمتِ عالم حضرت محمد مصطفیٰ ﷺ اور نواسۂ رسول حضرت امام حسن مجتبیٰؑ کی شہادت کی مناسبت سے دنیا بھر میں غم و سوگ کی فضا قائم ہے۔ اس موقع پر مختلف ممالک میں مجالسِ عزا، نوحہ خوانی، ماتم اور جلوس ہائے عزا کا سلسلہ جاری ہے۔
پاکستان سمیت مختلف ممالک میں امام بارگاہوں، مساجد اور مذہبی مراکز میں خصوصی مجالس منعقد کی جا رہی ہیں، جہاں علماء، ذاکرین اور خطباء رسولِ اکرم ﷺ کی سیرتِ طیبہ، اخلاقِ حسنہ اور امت کے لیے آپ ﷺ کی عظیم خدمات کے ساتھ ساتھ فرزندِ علیؑ و فاطمہؑ، نواسۂ رسول امام حسن مجتبیٰؑ کی حیاتِ مبارکہ، کردار، صبر، حلم اور قربانیوں پر روشنی ڈال رہے ہیں۔
مختلف شہروں میں عزاداروں کی جانب سے علم، ذوالجناح اور شبیہِ تابوت کے جلوس برآمد کیے جاتے ہیں، جن میں نوحہ خوانی، سوز و سلام اور ماتم کے ذریعے رسولِ خدا ﷺ اور امام حسن مجتبیٰؑ کی بارگاہ میں عقیدت و محبت کا اظہار کیا جاتا ہے۔
یہ بھی پڑھیں : امریکا اور ایران سمجھوتے کے قریب ہیں، خواجہ آصف
عراق سمیت مقدس مقامات پر بھی 28 صفر کی مناسبت سے عزاداری کے اجتماعات منعقد ہوتے رہے ہیں، جہاں حرمینِ مقدسین میں مجالس، ماتمی جلوس اور نوحہ خوانی کے ذریعے شہادتِ رسولِ خدا ﷺ اور اہلِ بیتؑ کے مصائب کو یاد کیا جاتا ہے۔
28 صفر صرف ایک تاریخ نہیں بلکہ رسولِ رحمت ﷺ اور آپ کے نواسے امام حسن مجتبیٰؑ سے عقیدت و محبت کے اظہار کا دن ہے، جب دنیا بھر کے عزادار غمِ رسول ﷺ اور غمِ سبطِ رسولؑ میں مجالس و جلوسِ عزا کے ذریعے اپنی وابستگی کا اظہار کرتے ہیں۔
The post 28 صفر: شہادتِ رسولِ خدا ﷺ اور امام حسن مجتبیٰؑ، دنیا بھر میں مجالس و جلوسِ عزا appeared first on شیعہ نیوز پاکستان.
