شیعہ نیوز: مجلس وحدت مسلمین کراچی ڈویژن کے صدر حافظ کاظم عباس کا کہنا ہے کہ کوہاٹ پولیس لائن مسجد میں ہونے والے خودکش دھماکے کی شدید مذمت کرتے ہیں، پاکستان میں دہشتگردی کے پیچھے امریکا، اسرائیل و بھارت ملوث ہیں، کالعدم تنظیمیں اسرائیلی بھارتی ایماء پر ملک بھر میں سنی شیعہ مسلمانوں کو دہشتگردی کا نشانہ بنا رہی ہیں، دہشتگرد عناصر اسلام اور پاکستان کے دشمن ہیں، آخری دہشتگرد کے خاتمے تک انکے خلاف بے رحم آپریشن کیا جائے۔
ان خیالات کا اظہار انہوں نے وحدت ہاؤس کراچی میں ڈویژنل کابینہ کے ہنگامی اجلاس کے دوران گفتگو کرتے ہوئے کیا۔ حافظ کاظم عباس نے کہا کہ امریکا، اسرائیل اور بھارت کی جانب سے منظم سازش کے تحت پاکستان میں دہشتگردی کو دوبارہ پروان چڑھانے کی ناپاک سازش کی جا رہی ہے جبکہ حکمران خواب غفلت کے مزے لے رہے ہیں۔ انہوں نے کہا کہ یہ مسلکی نہیں بلکہ مسلم پاکستان ہے، شیعہ سنی نے ملکر پاکستان بنایا تھا اور ملکر بچائیں گے۔
حافظ کاظم عباس نے وفاقی و صوبائی حکومت سے مطالبہ کرتے ہوئے کہا کہ بھارتی اسرائیلی آلہ کار کالعدم دہشتگرد تنظیموں کی سرگرمیوں پر پابندی کے بغیر امن کبھی بھی قائم نہیں ہو سکتا، لہٰذا سانحہ پولیس لائن مسجد میں ملوث دہشتگرد عناصر اور انکے سہولت کاروں کو کیفر کردار تک پہنچایا جائے، ملک بھر میں کالعدم دہشتگرد تنظیموں کی سرگرمیوں پر پابندی، دفاتر بند اور فوری طور پر انکے رہنماؤں کو گرفتار کیا جائے۔
حافظ کاظم عباس نے کہا کہ مجلس وحدت مسلمین دکھ کی اس گھڑی میں شہداء و زخمیوں کے خانوادوں کے شانہ بشانہ کھڑی ہے، شہدا کے اہل خانہ سے تعزیت اور زخمیوں کی جلد صحتیابی کیلئے دعاگو ہیں، حکومت شہدا کے لواحقین کی نہ صرف داد رسی کرے بلکہ زخمیوں کے علاج معالجے کیلئے بھی تمام تر سہولتیں فراہم کی جائیں۔
The post پولیس لائن مسجد دھماکہ، پاکستان میں دہشتگردی کے پیچھے امریکا، اسرائیل و بھارت ملوث ہیں،حافظ کاظم عباس appeared first on شیعہ نیوز پاکستان.
