شیعہ نیوز: سعودی عرب نے صیہونی حکومت کے ساتھ تعلقات کو معمول پر لانے کی اسرائیل کی خواہش پر ایک بار پھر پانی پھیرتے ہوئے اسرائيلی طیاروں کو اپنے ملک میں لینڈ ہونے کی اجازت دینے سے انکار کر دیا ہے۔
سعودی عرب نے تقریباً 180 اسرائیلی مسافروں کو لے جانے والے طیارے کو ہنگامی لینڈنگ کی اجازت تو دے دی تھی لیکن تل ابیب کی جانب سے فوجی و غیر فوجی ٹرانسپورٹ طیاروں کو تبوک بھیجنے کی درخواست مسترد کر دی ہے جس سے صاف ظاہر ہے کہ ریاض اب بھی صہیونی حکومت کے ساتھ تعلقات معمول پر لانے سے گریز کر رہا ہے۔
رپورٹ کے مطابق اسرائيلی اخبار یدیعوت آحارنوت نے لکھا ہے کہ فلائی دبئی کے طیارے کی تبوک کے بین الاقوامی ہوائی اڈے پر ہنگامی لینڈنگ کے بعد صہیونی حکام نے سعودی عرب سے درخواست کی کہ وہ اس حکومت کی فضائیہ کے C-130J ٹرانسپورٹ طیاروں کو اسرائیلی مسافروں کی منتقلی کے لیے سعودی سرزمین میں داخل ہونے کی اجازت دے لیکن ریاض نے اسے مسترد کر دیا۔
یہ بھی پڑھیں : شمالی یمن کے علاقوں پر سعودی لڑاکا طیاروں کافضائی حملہ
اس رپورٹ کے مطابق سعودی عرب نے طیارے کی ہنگامی لینڈنگ کی اجازت دی، زخمی پائلٹوں کو علاج کے لیے اسپتال منتقل کیا اور مسافروں کو بھی طبی سہولیات اور کھانے پینے کی خدمات فراہم کیں تاہم سعودی حکام نے صہیونی حکومت کے فوجی طیاروں کی سعودی سرزمین پر لینڈنگ کی مخالفت کی ہے۔
یدیعوت آحارنوت نے لکھا کہ ایسا اقدام اسرائیل کے ساتھ تعلقات معمول پر لانے کی جانب پیشرفت کی واضح علامت سمجھا جا سکتا تھا اور ریاض کو اس کی سیاسی قیمت چکانی پڑ سکتی تھی۔
اخبار نے مزید لکھا کہ موساد نے اس واقعے کے دوران سعودی حکام سے مسلسل رابطہ قائم رکھا اور انھیں اس بات پر آمادہ کرنے کی کوشش کی کہ وہ تبوک میں ایک ایسے غیر فوجی طیارے کی لینڈنگ کی اجازت دیں جس پر اسرائیل کا کوئي نشان نہ ہو لیکن سعودی عرب نے اسے تسلیم نہیں کیا اور طیارے کے مسافر فلائی دبئی کی متبادل پرواز کے ذریعے سعودی عرب سے باہر نکل گئے۔
اسرائیلی میڈیا “والا نیوز” نے بھی رپورٹ دی ہے کہ سعودی عرب نے فلائی دبئی کی پرواز سے متعلق تحقیقات کے عمل سے اسرائیل کو الگ رکھا اور تل ابیب ابتدائی تحقیقات میں ریاض سے براہ راست معلومات حاصل نہیں کر سکا۔
اس میڈیا کے مطابق، اسرائیل کو زیادہ تر معلومات متحدہ عرب امارات، مسافروں اور امریکہ سے حاصل ہوئی ہیں۔
The post سعودی عرب کی جانب سے اسرائیلی طیاروں کی لینڈنگ کی مخالفت، تعلقات معمول پر لانے کی کوششوں پر پانی پھیرا appeared first on شیعہ نیوز پاکستان.
