حوزہ/ آج سے نصف صدی قبل کی بات ہے کہ انارکلی بازار میں ہماری ایک دکان تھی، جو ’’بٹ اینڈ کمپنی‘‘ کے نام سے موسوم تھی۔ اب یہ دکان ختم ہو چکی ہے۔ اس دکان کی بالائی منزل پر علامہ اقبال مرحوم کا دفتر واقع تھا۔ یہ وہ زمانہ تھا جب علامہ مرحوم اپنی جوانی کے عروج پر تھے اور روزانہ صبح کے وقت اپنی گھوڑا گاڑی پر سوار ہو کر اس وقت کی عدالتِ عالیہ، یعنی چیف کورٹ، جایا کرتے تھے۔ اس زمانے میں بھی آپ نہایت پُروقار شخصیت کے مالک تھے اور قابلِ رشک صحت رکھتے تھے۔
