شیعہ نیوز:امریکی ریاست کنیکٹیکٹ سے تعلق رکھنے والے ڈیموکریٹ سینیٹر کرس مرفی نے مشرق وسطیٰ میں امریکی فوجی اڈوں پر رواں سال ایران کے حملوں سے ہونے والے نقصانات کی تفصیلات چھپانے پر پینٹاگون کو تنقید کا نشانہ بنایا ہے۔
کرس مرفی نے ٹرمپ انتظامیہ اور پینٹاگون پر الزام عائد کیا کہ وہ خطے میں امریکی فوجی اڈوں کو پہنچنے والے نقصانات کی اصل شدت چھپانے کی کوشش کر رہے ہیں۔
انہوں نے بتایا کہ اکتوبر میں قطر اور سعودی عرب کے دورے کے دوران انہیں قطر میں ان فوجی تنصیبات میں داخلے کی اجازت نہیں دی گئی جو اس سے قبل ایرانی حملوں کا نشانہ بن چکی تھیں۔ انہوں نے امریکی وزارت جنگ سے مطالبہ کیا کہ نقصانات کی حقیقی صورت حال واضح کی جائے۔
واشنگٹن میں مشرق وسطی کے مطالعاتی ادارے کے ایک اجلاس سے خطاب کرتے ہوئے مرفی نے کہا کہ یہ حقیقت چھپانے کی ایک واضح کوشش ہے۔ امریکی حکام نہیں چاہتے کہ عوام کو ان فوجی اڈوں کو پہنچنے والے نقصانات کے بارے میں معلوم ہو اور نہ ہی وہ چاہتے ہیں کہ کانگریس کے ارکان کو خطے میں تعینات فوجی کمانڈروں اور اہلکاروں سے براہِ راست بات چیت کا موقع ملے۔
امریکی سینیٹر نے اس بات پر زور دیا کہ خطے میں تعینات فوجی کمانڈر اور میدان عمل میں موجود اہلکار عموماً زمینی صورت حال سے متعلق معلومات کے معتبر ترین ذرائع میں شمار ہوتے ہیں۔
مرفی نے اپنے دورے کے دوران جاری کی گئی ایک ویڈیو میں بھی بتایا تھا کہ انہیں قطر میں العدید ایئر بیس میں داخلے کی اجازت نہیں دی گئی۔ ان کے خیال میں پینٹاگون جان بوجھ کر اس فوجی اڈے کو پہنچنے والے نقصانات کی اصل تفصیلات چھپانے کی کوشش کر رہا ہے۔
اس سے قبل امریکی ٹیلی ویژن نیٹ ورک این بی سی نے چھ باخبر ذرائع کے حوالے سے رپورٹ دی تھی کہ ایران کے حملوں کے نتیجے میں خلیج فارس کے خطے میں امریکی فوجی اڈوں اور دیگر فوجی اثاثوں کو اربوں ڈالر کا نقصان پہنچا ہے۔
The post فوجی اڈوں کو پہنچنے والے نقصانات چھپانے پر امریکی سینیٹر کی پینٹاگون پر تنقید appeared first on شیعہ نیوز پاکستان.


