شیعہ نیوز: سکردو میں پاکستان پیپلز پارٹی اور اسلامی تحریک کے مابین ممکنہ انتخابی اتحاد خطرے میں پڑ گیا، دونوں جماعتوں میں اختلافات شدت اختیار کر گئے ہیں۔ رپورٹ کے مطابق پیپلز پارٹی بلتستان کے صدر بشارت ظہیر نے چند روز قبل اپنے ایک انٹرویو میں کہا تھا کہ اسلامی تحریک کا سکردو حلقہ نمبر 1 میں کوئی ووٹ بینک ہے اور نہ ہی اس جماعت کا کوئی امیدوار موجود ہے۔ پیپلز پارٹی کے ڈویژنل صدر بشارت ظہیر کے انٹرویو پر اسلامی تحریک سکردو کے جنرل سکریٹری شیخ احمد ترابی سامنے آگئے اور انہوں نے پیپلز پارٹی کے ڈویژنل صدر بشارت ظہیر کے بیان پر شدید ردعمل کا اظہار کیا ہے اور کہا ہے کہ پیپلز پارٹی کے صدر کو باور کرانا چاہتے ہیں کہ اسلامی تحریک کا سکردو حلقہ نمبر 1 میں ووٹ بینک ہے یا نہیں اس کا پتہ وقت آنے پر چلے گا۔
ان کا کہنا تھا کہ ہم میدان میں کھڑے ہیں تاہم ریلیاں نکال کر فضول خرچی نہیں کریں گے کیونکہ اسلام فضول خرچی سے منع کرتا ہے۔ اسلامی تحریک پہلے دینی پھر سیاسی جماعت ہے، اسلامی تحریک جیت نہ سکی تو کسی جماعت کو ہرانے میں کردار ادا کر سکتی ہے۔ پیپلز پارٹی سمیت کوئی جماعت اس غلط فہمی میں نہ رہے کہ اسلامی تحریک کا سکردو حلقہ نمبر 1 میں امیدوار موجود نہیں ہے۔ رپورٹ کے مطابق پیپلز پارٹی کے ڈویژنل صدر بشارت ظہیر اور اسلامی تحریک کے ضلعی جنرل سکریٹری شیخ احمد ترابی کے مابین لفظی گولہ باری کے بعد دونوں جماعتوں کے مابین ممکنہ انتخابی اتحاد کے امکانات کم نظر آتے ہیں۔
The post سکردو میں پیپلزپارٹی اور اسلامی تحریک کا ممکنہ انتخابی اتحاد خطرے میں پڑ گیا appeared first on شیعہ نیوز پاکستان.
