شیعہ نیوز : اقوام متحدہ نے بدھ کے روز خبردار کیا کہ افغانستان سے سرگرم کالعدم تحریکِ طالبان پاکستان ایک ‘سنگین اور بڑھتا ہوا علاقائی خطرہ‘ ہے۔
ادھر چین نے بلوچ لبریشن آرمی اور اس کی مجید بریگیڈ کو ممنوعہ تنظیم قرار دینے پر زور دیا۔
اقوام متحدہ میں ڈنمارک کی نائب مستقل نمائندہ اور سلامتی کونسل کی القاعدہ پر پابندی کمیٹی کی سربراہ، سینڈرا جینسن لینڈی نے سلامتی کونسل کو پیش کی گئی رپورٹ میں کہا کہ ”تقریباً 6,000 جنگجوؤں پر مشتمل تحریک طالبان پاکستان (ٹی ٹی پی) ایک اور سنگین علاقائی خطرہ ہے، جسے افغانستان کے حکمران طالبان حکام کی جانب سے لاجسٹک اور خاطر خواہ مدد مل رہی ہے۔‘‘
داعش اور القاعدہ پابندیوں کی کمیٹی کی چیئر کی حیثیت سے 15 رکنی کونسل کے سامنے رپورٹ پیش کرتے ہوئے، سفیر لینڈی نے ٹی ٹی پی کو ”ایک سنگین اور بڑھتا ہوا علاقائی خطرہ‘‘ قرار دیا اور کہا کہ اس دہشت گرد گروہ نے افغانستان کی سرزمین سے پاکستان میں متعدد ’ہائی پروفائل‘ حملے کیے ہیں، ’’جن میں سے بعض میں بڑی تعداد میں جانی نقصان ہوا۔‘‘
انہوں نے مزید کہا کہ اس گروہ کا اثر و رسوخ خطے کی دیگر دہشت گرد تنظیموں کے ساتھ ساتھ بڑھ رہا ہے۔
لینڈی نے کہا کہ داعش اور القاعدہ سے منسلک گروہ شام سے لے کر افریقہ تک اپنا دائرہ بڑھاتے جا رہے ہیں، اور عدم استحکام، کمزور حکمرانی اور کرپٹو کرنسی و سوشل میڈیا جیسی ٹیکنالوجیز کا استعمال کرتے ہوئے فنڈز اکٹھا کر رہے ہیں، پیروکار بھرتی کر رہے ہیں اور پرتشدد پیغامات پھیلا رہے ہیں۔
بریفنگ کا جواب دیتے ہوئے پاکستان کے نمائندے عثمان جدون نے دہشت گردی کے خلاف اسلام آباد کی طویل جدوجہد کو اجاگر کرتے ہوئے کہا کہ پاکستان نے 80,000 سے زائد جانیں قربان کی ہیں اور افغان سرزمین سے کام کرنے والے گروہوں کا مقابلہ کرتے ہوئے اربوں ڈالر کے معاشی نقصانات برداشت کیے ہیں۔
یہ بھی پڑھیں : مقبوضہ فلسطینی علاقوں کی متعدد عمارتوں میں پُراسرار آگ
جدون نے کہا کہ پاکستانی سکیورٹی فورسز داعش خراسان، ٹی ٹی پی اور اس کے اتحادی گروہوں کے ساتھ ساتھ بلوچ لبریشن آرمی (بی ایل اے) اور اس کی مجید بریگیڈ کا بھی مقابلہ جاری رکھے ہوئے ہیں، جو ان کے مطابق افغان سرپرستی میں پھل پھول رہے ہیں اور جنہیں مبینہ طور پر پاکستان کے ‘بنیادی مخالف‘ کی پشت پناہی بھی حاصل ہے۔
انہوں نے اقوام متحدہ کی سلامتی کونسل پر زور دیا کہ پابندیوں کے نظام میں زمینی حقائق کی مناسب عکاسی ہونی چاہیے اور تنظیموں کو فہرست میں شامل یا خارج کرنے کے فیصلے شفافیت کے ساتھ، سیاسی مصلحتوں سے پاک طریقے سے کیے جائیں۔ انہوں نے اس امر پر زور دیا کہ تمام زیرِ جائزہ اداروں کے لیے غیر جانبدارانہ طریقہ کار ضروری ہے۔
چین نے پاکستان کے مؤقف کی حمایت کرتے ہوئے پابندیوں کی کمیٹی کے ارکان پر زور دیا کہ وہ بلوچ لبریشن آرمی (بی ایل اے) اور اس کی مجید بریگیڈ کو فہرست میں شامل کرنے کی منظوری دے۔ چین نے کہا کہ یہ اقدام ہر طرح کی دہشت گردی کے خلاف پختہ عزم کا واضح پیغام دے گا۔
The post اقوام متحدہ نے بھی ٹی ٹی پی کو علاقائی خطرہ قرار دے دیا appeared first on شیعہ نیوز پاکستان.
